楊梅埔心故事館
【文、圖／徐貴榮／國立中央大學客家語文暨社會科學學系兼任助理教授】
發音人：徐貴榮（四縣腔）
籌備忒歸十年个楊梅埔心故事館，在本（111）年3月17日成立開幕。開幕儀式由鄭文燦市長主持，今過埔心有歷史文化館吔！又多加一隻休閒遊尞个位所。
故事館歸隻園區有歷史館（圖1）、新館兩部分。歷史館係園區个主體建築，這隻歷史建築屋舍在日本時代明治40（1907）年起建，第二年完成，到今有百零年个歷史。主要係茶業改良場个日本員工宿舍，也係埔心到今還伸盡久个屋舍。這棟三連棟个建築，係臺灣茶葉試驗單位重要人員同主管个宿舍。後來因為無麽个經費好修整，民國85（1996）年盡尾一個住戶搬走過後，就無過再使用，結果漸漸仔壞忒咧！到民國103年茶改場場長陳右人教授正委託台北科技大學建築系張昆振副教授登錄為桃園縣歷史建物。
圖1 埔心故事館个歷史館（2022.06.12攝）
桃園縣改為桃園市，受着鄭市長大力个支持。經過兩擺大整修過後，交分楊梅區公所管理，定名安到「埔心故事館」，裡背規劃歷史建築空間，以「茶文化」過「埔心地方文化」為主，鼓勵民間共同參與。目標就係愛摎臺灣茶葉歷史文化同埔心發展个故事，分還較多人知得，達着教育、文化、觀光3合1个效果。故所館肚設有故事館展示區、時光行廊（走廊）、日式居家空間再現區、茶改場歷史區這兜。展示區包括「埔心在地文化」、「歷史建築風貌」、「茶產業」三隻長透展區，定期辦理茶、地方文化特展、創作者展示厥作品，分人還較了解埔心當地个文化。
新館（圖2）係新起个建築，主要係賣台灣各地个茶米、茶飲這兜產品為主。裡肚有茶學講堂、思茶坊兩間。大門一落去係「茶學講堂」，其實係會議室，做得坐五十儕落，平時提供辦理茶學教育訓練、專題演講、茶葉文化活動个所在。過落去係「思茶坊」，無已大間，展示臺灣有名个優良茶米、書籍，做得購買，也做得坐下來，泡杯茶，在書架頂拿本書來看。看書傍茶，書香茶香滿屋間。
圖2 埔心故事館个新館（2022.06.12攝）
埔心故事館以「茶」為主，主要就係佢係茶改場宿舍修整完成个。大家愛知，做麼个茶改場會設到埔心呢？日本人來到臺灣，就發現原來這竹北二堡草湳陂庄安平鎮一搭仔，透到楊梅秀才窩，地形以山排為主，氣候當適合種茶，人民種茶生活。就在明治35（1902）年12月，設制「安平鎮製茶試驗場」，到第二（1903）年7月完成，並在10月開始進行製茶試驗。
「安平鎮製茶試驗場」經過幾下擺改名，到這下變到「行政院農業委員會茶業改良場」（圖3），簡單安到「茶改場」，毋過埔心當地人係喊佢「茶葉試驗所」，有時簡單喊佢「試驗所」。在當時引進最新个做茶機器並改良茶樹品種，培育優良茶樹品種、研究茶園栽培、管理技術、病蟲害防治、製茶技術、茶米外銷這兜，使得臺灣个茶產業，在世界當出名發展。
圖3 行政院農業委員會茶業改良場大門場景（2011.10.20攝）
茶又有綠金、茶金个講法，係台灣非常重要个經濟同外銷產物。茶業改良場負責全臺灣茶產業个研究、推廣業務，受着有關單位个重視，到今培育出重要个台灣茶種有二十零種。其中，台茶12號金萱、台茶13號翠玉、台茶18號紅玉這兜烏龍茶、紅茶，做得講係台灣茶葉發展非常重要个品種，受着大眾个歡迎。
茶業改良場設置百零年以來，對當地影響也已大，毋單止提高「埔心」个知名度，也提供當地人个工作。埔心地區早期無工場，人民除忒耕兜田以外，就係種茶、種燥作、打零工生活。茶業改良場設立過後，有兜人改去上班、摘茶，改善生活。到今恁闊个茶園，當多人打早就去散步，像埔心人个後花園。
故事館成立過後，相信當多人會去散步、遊尞，分人還較了解茶葉文化、埔心个歷史人文，提高知識程度。（圖4）
圖4 茶業改良場日式宿舍說明，看得出吂修整前个樣貌。（2022.06.12攝）
※本文的「着」，同教育部訂的「著」之意。
