天狗食月
【文／何石松】
發音人：何石松（海陸腔）
天狗食月，係一種天文介自然現象，但是，從古到今，就摎佢介出現，當做係將將會有某種事情發生介頭彩，可能毋係一件好介事情，愛有一種驚心正好。所以，天狗食月，斯有各種講法：比論講，天狗食月，食毋落；也有人講：天狗食月，天垂象，見吉凶；天狗食月，愛用鼓來救；月食四月中，一定有大風等等。
該麼介安到天狗？有人講天狗係一種動物，獸類。《山海經•西山經》斯講：「向西片三百里，名安到陰山，有獸類，佢介樣仔像狐狸，頭那白白，安到天狗。」該下還吂有人講佢會食月，不過，在〈大荒西經〉又講：「金門之山有紅狗，名安到天狗，出現時節斯有戰爭。」加上郭璞介注解，嗄摎這天狗當做天狗星，後來介人，就認為天狗出現毋係好頭彩。
有人講天狗係天頂介星仔，《史記•天官書》講：「天狗，斯像飆著當遽介星仔，有聲，跌到泥下，樣仔像條狗，跌落介位所，有沖天沖地介火光，係講下背圓圓，斯有幾下甲介田恁闊，頂高尖尖，係黃色，表示千里之外有將軍分人㓾忒。」這係講天狗出現，就毋係好事情。歷史上也正經有天狗出現，人間斯有血光之災。在宋朝大明三年(459)，五月19暗晡，有星仔瀉屎像斗恁大，尾長十過丈，從西北方向飛等來，跌落城內，就安到天狗。卜卦介人講：天狗所跌下介位所，就有身屍流血。正經係已得人驚介事情。
也有人講天狗係目連厥姆變介。聽講目連厥姆儘壞，愛害和尚開葷，斯挑挑做咧360隻葷介饅頭，分廟肚介和尚仔食。玉皇大帝知了以後，非常閼，就摎佢打落十八層地獄，變成一條惡狗。孝順介目連，修道之後，又摎厥姆救出來。厥姆變成惡狗以後，當恨玉皇大帝，就走去尋佢出水，無尋著玉皇大帝，路上看著月光，斯摎佢咬著來愛吞落去，這種天文現象，就安到天狗食月。民間看著月光會分天狗食忒，大家就遽遽打紙炮，打銅鑼，打鑼鼓，一時之間，鑼鼓喧天，害該惡狗嗄驚著，遽遽摎佢呸出來，就係所謂介「爛鼓好救月」，「天狗食月，食毋落去」，毋使驚。
打鼓救月介來源盡早，在上早時代介周朝，係講發生天狗食月介事情，大王一定親自打大鼓主持救月介活動，全國百姓跈等救月，《周禮》斯講：「愛救月，大王一定親身打鼓，聲音特別大。」這係表示牽涉著全民安全幸福介事情，愛特別重視，因為，天象介變化，人民介痛苦，斯像痛在自家心肝共樣，係對天介一種尊敬。
《周禮•春官宗伯》斯講：「凡是天狗食日，天狗食月，各地名山驚怕有崩忒介危險，各國諸侯驚怕會無命，愛撤忒所有音樂活動。」所以，係講發生天狗食月介事情，表示天頂無和挼，人間也無幾平靜，一定愛謹慎應對。
歷史上儘多因為天狗食月發生災難介事情，這下，吾俚斯拿這幾年來天狗食月介例仔做參考，來居安思危。在2019年7月16日天狗食月，年下就傳來新冠肺炎傳染病介不幸消息，世界各國，緊張應對，大陸還實施封城，全無過年氣氛。
2020年正月11日，6月5日，11月24日，11月30日總共發生4次天狗食月，該年係新冠肺炎嚴重介一年，恁堵好，又係所謂介庚子年。《黃帝地母經》講：「太歲庚子年，人民多暴卒」，意思係庚子年，盡多人會無意無思死忒，該就係瘟疫介關係。
2021年5月26日天狗食月，這擺食月時間當久，長到點半鐘，歸隻月光血紅色，人安到血月，紅月光，斯代表瘟疫摎戰爭。過來，11月19日，又一擺天狗食月，出現介係血紅色介月光，實在已得人驚。
到了2022年5月16日(舊曆4月16)，又出現天狗食月，這擺也係血紅色介月光。恁堵好，前幾日起大風，所謂「食月四月中，一定起大風」，起介係北風，所謂「四月北風水打杈(樹枝)」表示有大水。尤其在正月6號，舊曆介12月初4暗晡響雷公，所謂「冬裡雷，屍成堆」，毋係講笑介，難怪天狗食月，係一種天垂象，見吉凶介警告，係天公指點吾俚，愛好好反省咧。
果然，到了2022年6月27日為止，全世界確診人數，多到5億4354萬人確診，632萬8974人因為瘟疫死亡。美國8696萬7639例確診，死亡101萬5938儕；台灣總共3641921例確診，6345儕死亡。聽講2022年11月8號又會天狗食月，會出現一隻靚靚介紅月光，千萬毋好用欣賞介態度來看，愛用惻隱痛腸介慈悲心情，遽遽來提早防疫正好啊！
※本文的「介」為大眾通用的「的」，同教育部訂的「个」之意。
