直攻博士
【文、圖／鍾榮富／南臺科技大學應用英語系講座教授】
發音人：鍾榮富（南四縣腔）
還毋曾出國進前，輒輒看海外學者寫个文章，有人講某人出國去「直攻博士」，試著盡佩服，碩士毋使讀，直接讀博士，還得人欽佩哦。當時𠊎有兩三個同學在研究所苦讀，逐擺去看佢等，都愛讀到一兩點，故所有人跳過碩士，直攻博士，不得不欽佩。自家來到香檳以後，麼个都無閒去管，乜無閒去問，逐日都在圖書館地下室个「洗腦」（cell）裡肚，盡命牯補頭擺無讀過个書。實在講，香檳有幾大，有麼个地方使得看，全部都無知。
等到愛考「課」（qua, qualification，博士資格考），正知在這讀書，毋係想讀就使得讀个，原來愛讀博士班，先愛考課，通過以後，正真實在博士班讀書。係若考試無通過，做得再考一擺，再無過，學校會送一張碩士文憑，接等就愛款包袱，去尋別个所在繼續學業，無就歸轉台灣食自家了。到這正知，在美國讀書，每儕都係直攻博士，做得直攻抑係做毋得直攻，主要个分水嶺就係課。有考過，萬里晴空，無考過，歸片烏雲。
由於對國外生活了解有限，又無親戚、無朋友好商量，毋知愛讀幾久，第一年驚驚，毋敢帶屋下人共下來。𠊎拋家棄子，單槍匹馬來到香檳，故所做得全心讀書，無麼个其他顧慮同煩惱。後來𠊎全家同來香檳食苦以後，為了細人仔个搞伴，正同台灣來个鄉親過有接觸。鄉親聚會，除了談台灣个政治以外，還分享各種來香檳讀書个辛酸史。有人考無過課，轉行去開雜貨店，專門賣台灣人愛用着个食物、用品。有人改行去賣披薩，出入各地區个人家門頭，讓鄉親了解美國人个生活。有人神經出了問題，歇啊在瘋人院。有人轉去別个系所繼續留啊在這，有人換去別州讀書，乜有人歸轉台灣。種種命運，百樣人生，實在讓人心驚膽怕。
𠊎對語言學，向來驚多於愛，感覺無天分，乜無興趣，毋過既然入了行，頭剃仔一半，想愛轉回頭已經困難重重了。在恁仔个情況下，𠊎頭頃頃去報名該年个課，總共四科，每一科都係朝晨八點領卷，第二日八點繳卷。四科之中，句法、音韻為理論，自家選一科應用(𠊎選社會語言學)，最後係獨立研究，愛交出一份自家做个研究論文。頭前兩科係主角，係有一下毋堵好，可能就愛再來一擺了。
果然考出來个成績，句法無通過，愛第二學期再重來補考。但係講出𠊎行入客語个研究，獨立研究係轉捩點。當時做个研究，就係後來分系上个教授選入系上刊物Studies in the Linguistic Sciences个客語論文，靠等這篇論文，𠊎免除了補考。就恁樣，進入「直攻博士」个課程。
