信仰
【文／林苡嘉】
發音人：林苡嘉（四縣腔）
2022中大客語文學暨客語歌曲創作獎 客語散文類 第三名
從細到大，𠊎一直認為𠊎係一个無信仰个人。
信仰係麼个？信仰對𠊎來講，大約就係有一个系統，做得分人在堵着困難个時節有做得倚恃个東西，做得分自家有生活下去个力量。平常時這系統對大部分个人來講影響無幾大，毋過，若係堵着問題个時節，信仰个作用就變到當大咧。
這隻社會大體都會摎「宗教」同「信仰」放在共下來講，一開始𠊎乜係恁仔想。有信仰个人應該會在過年過節該下敬神、食齋，抑係任何佢相信个宗教希望信徒愛做着个事情，𠊎從細到大都毋識做過任何摎這兜有關个事情，除忒吾婆喊𠊎做个時節，毋過其實𠊎淨係照等做佢喊𠊎做个事情定定，有成時𠊎根本毋知該隻活動有麼个意義。
直直到讀了大學，𠊎有當多機會接觸著各種無共樣宗教个人，𠊎發現佢兜對自家个信仰有當大个信心，堵着任何問題都會用宗教个方式來解決。還過大部分有堅定信仰个人都當溫柔，對其他个人有當大个包容。𠊎開始重新思考「信仰」个意義。「信仰」到底係麼个？就像一開始講个，𠊎認為，信仰應該係一个做得分人在堵着困難个時節，做得倚恃个系統。𠊎也想愛有一个信仰，𠊎也想愛變做一个溫柔个人，也想愛在堵着困難个時節有做得倚恃个系統。這个世界上宗教恁多，所有个宗教都非常歡迎新个信徒加入，上大學以後，𠊎也參加了一息仔宗教團體个活動，像佢等平常時打鬥四𠊎都會去參加，毋過一到宗教性質較重个活動，𠊎就會有兜毋敢接觸該兜活動，雖然𠊎一直希望自家也做得有一个堅定个信仰。
到這位，𠊎突然發現，信仰敢一定愛係一个「宗教」？𠊎想，應該毋係恁樣。「信仰」講个毋就係一个分人做得倚恃个系統？也無一定愛係一个「宗教」，恁樣，𠊎從細到大一路行過來，倚恃等麼个？
𠊎一直以來倚恃等个東西，係客家。
記得還細个時節，學校先生就輒常分𠊎出去參加各種客家比賽个機會，無論朗讀、演講、歌謠，有成時還會有出去表演个機會，雖然講吾屋下平常時無講客家話，在恁多比賽摎表演之中，還係當大程度提高咧𠊎對客語个信心，過後𠊎就開始逐日摎客語共下生活个日仔，生活裡肚滿哪仔都係客家話。
大約係在𠊎讀國小四年生个時節，因為忒愛客家、生活裡肚除忒客家就再過無其他東西、淨對客家文化有興趣个𠊎，就恁樣，分其他个同學認為係一个奇怪个人，過後就毋識過同𠊎講話抑係做任何事情，就連體育課乜係盡尾一隻分組个人。毋同𠊎講話、分組無摎𠊎共下這兜都係堵堵好定，𠊎印象盡深係有一擺表演過後，𠊎還企在舞台邊脣，吾同學嗄行過來笑𠊎，該種笑，絕對毋係阿𧩣人个笑，該種笑，係恥笑，係對𠊎這隻人，對客家文化个侮辱，該擺个經驗分𠊎試著當毋鬆爽。雖然講𠊎係在客家莊大个，毋過該央時个環境對客語還係無恁包容，就算學校逐禮拜有一節客語課，吾同學對客家話个想法還係「該係老人家用个語言」，毋係摎客家話看做人摎人溝通个工具。𠊎就因為恁樣，分其他个同學認為係奇怪个人，對還細个𠊎來講，正經係一个當大个壓力，𠊎變到當慍悴，當多擺𠊎都希望自家做得離開這兜認為𠊎奇怪个人，離開這隻世界，離開這個無法度包容𠊎个所在。
係麼个東西分𠊎有留下來个力量？係客家。因為有一日，吾心肝肚有一個聲音同𠊎講：「𠊎當重要，這隻世界、這隻世代大概當少有人摎𠊎共樣，恁煞猛想愛推行客家語文。」講也奇怪，同學認為𠊎係怪人，嗄變做一个提醒，提醒𠊎，𠊎愛加油、𠊎愛珍重，為𠊎所愛个客語煞猛打拚！也因為恁樣，𠊎愐著：𠊎正經當愛當愛客家，客家文化對𠊎來講就像係一種信仰！其他个人有可能會因為耶穌抑係觀世音菩薩抑係其他个信仰得着繼續向前行个力量，𠊎斯因為客家文化得到繼續向前行个力量。
故所，一直以來，𠊎毋係一个無信仰个人，𠊎係一个有信仰个人，𠊎个信仰安到「客家」。
得獎感言：
非常感謝客家系舉辦這擺个文學獎，分𠊎有這擺機會寫這篇文章。雖然講平常時在生活裡肚講客話个機會當多，毋過用客話寫文章个機會斯真經無恁多，對𠊎來講還係有一息仔難度，毋過𠊎還係寫出來咧，希望這擺个經驗做得成為𠊎寫客家文章个開始，過後做得寫出還較好个文章！
