避暑
【文／富岡 邱鴻春／中央大學機械工程學系碩士】
發音人：邱鴻春（海陸腔 桃園楊梅）
想着愛來放避暑，細人逐儕笑弛弛，
毋使七早八早䟘，睡到日頭晒屎胐。
毋過這下細人仔，大款全有學才藝，
抑係有來去補習，算來實在盡無閒。
想起四十零年前，阿爸阿姆做事人，
三餐食飽無問題，但係無錢好補習。
鄰舍細人共下尞，逐日樹園囥人尋，
還過黏蟬捉筍蛄，無愁無慮兩隻月。
黏蟬捏翼放樹頂，佢會噭到唧唧滾，
慢慢餳來當多伴，樹下坐涼鬧連連。
抓个筍蛄盡好搞，長嘴綯索分佢飛，
香骨揰腳做風車，比看麼人捩較久。
還有尋該開花竹，長目大空好利用，
剁下來做洩水笐，大家洩到滿身潦。
透日無閒煞猛搞，吂到正餐肚屎枵，
毋敢轉屋搜盆缽，自家愛來想辦法。
既然係在外背搞，外背滿哪就有寶，
不管園仔抑水肚，總有東西做得食。
最輒看著竻樖仔，酸甜酸甜盡好食，
摘个時節愛注意，毋好分竻來𠠃著。
還有盡多野芭仔，看係白面就熟了，
做得遽遽摘下來，好食毋摘鳥來食。
若係想愛食臭臊，田禾割忒拔禾頭，
就有湖鰍好來捉，下把還有大黃鱔。
還過田溝乜有寶，除了田螺有魚蝦，
短褲著等就來捉，一下捉到大嫲包。
田螺煮法盡簡單，來到阿姆个菜園，
跍下摘吔七層塔，還過一兜辣椒仔。
蒜頭切隻油𤐙香，接等田螺放落鑊，
加水蔭過田螺面，滾有幾滾放點鹽。
再放辣椒七層塔，鑊蓋弇等成分鐘，
做得起鑊香噴噴，大家食着笑哂哂。
魚蝦就用油來烰，烰好正來委點鹽，
三兩下手食淨淨，又係一日快樂天。
湖鰍黃鱔交阿姆，屋下做得來加菜，
表示避暑有貢獻，繼續分𠊎自由搞。
好得頭擺這環境，正會學著來煮食，
無像這下後生人，總係會喊胡朋打2。
註:
1避暑: pid chu ˊ 放暑假
2胡朋打: foodpenda
