Prosumer 理電，理財
【文／徐佳妤／國小客語支援教師】
發音人：徐佳妤（南四縣腔）
記得今年四月初七一入學校，教務處个組長同𠊎講：「徐先生，今晡日愛測一下用電个承載量看會跳電無？係你有聽着廣播，請先生打開教室个冷氣機哦。」𠊎心肚愐：定著係受著今年「三Ｏ三全臺大停電」个影響。該擺个停電做得講係恁多年來最嚴重个一擺，毋單淨部分用戶停電十二點鐘，高雄各大產業園區，像石化、鋼鐵業，淨一日就少了幾下十億！停電，會交通大亂、生理無法度做、冷凍个食品壞淨淨……對老百姓來講，堵着臨時个停電，麼个都做毋成，分人氣詞 蓋毋爽快！
記得還細个時節，風搓一來，蓋驚停水同停電，屋下總會準備好蠟燭，毋知仰仔，在暗摸胥疏个空間，點一支蠟燭，歸屋下人聚共下圍等打嘴鼓，比起用手電筒還較燒暖呢。又有一擺，𠊎渡倈仔坐電梯去診所，無想着正上到二樓，電梯嗄毋停動咧，正經「屎出褲帶又打結—急死人」一緊張，𠊎緊拍電梯門，該央時，門，打開咧！讀小學个倈仔同𠊎驚到該一駁仔都毋敢坐電梯。
新聞有講，三十年後，臺灣个用電量會緊來緊大，再生能源發電也會跈等提高，像：有一間牧場二Ｏ一二年起勢，打造全臺第一座个畜雞仔沼氣發電廠，將雞屎變成三百六十四萬度綠能發電量，除了牧場自家用，伸个電又做得賣分台電，「屙屎合扡芋仔」環保又賺錢，蓋壁！
乜有一間新創公司，今年佢等會提供一萬个家庭用戶裝能源管理系統，會用LINE通知用戶用電量，這兜用戶个用電資訊也會提供分台電。在未來，屋下係有裝能源管理系統、智慧電錶、細臺个儲能櫃等設備，若个手機仔接着通知：「電網 愛用電」，就撳一下APP，儲能櫃就會同電賣出去分台電，台電就分你錢。仰有恁好空个事情？正經有。在日本、歐美有兜地區早就有恁呢做，做得講「理電」个時代會到咧！
