五月節講焿粽、焿油過燒焿仔
【文、圖／彭欽清／國立政治大學退休教授】
發音人：彭欽清（四縣腔）
又到咧五月節了，這下人盡少自家䌈粽仔食，大體買便个，毋過焿粽就較少人䌈來賣。
原在人䌈焿粽个焿油係人工燒个，吾二哥還在該下識同𠊎講過，佢後生時節同隔壁个鄰舍去燒過焿仔，佢講這碗飯無恁該食。
盡先愛尋一垤雜樹林，有山芎蕉、山柿仔、蓾萁、這兜含焿量較多个樹仔抑山芋斬下來集等，清出一垤較平个地打焿胚仔，過後放兜燥草仔、樹椏、燥蓾萁，再將集好个樹仔過芋荷順等打好个焿胚仔凴落去，正來起火。
熟落个人，知愛照哪種順序來排會燒較有焿。等燥个草仔樹仔火燒猛起來，溼个樹仔芋荷就慢慢仔著起緊出水，流到火灰肚結團，等樹仔這兜總下燒忒，毋會燒了，正同焿團篩出來煮焿油。火當猛該下，較溼个樹仔乜燒得到熊熊，故所正會講「火烈毋驚生蓾萁」，意思講若係有本等，麼个較大个困難乜做得解決。寒天又較得，緊燒緊焙火，熱天就毋係搞，火煏等咧，汗流脈落，歸身仔潦潦，大家就𤸁到毋會歕火，毋會嘍雞。
民國98年12月新竹縣文化局出版廖景淵先生寫个《祖公的腳印──消失的行業及屋舍》這本書，有一章專門寫燒焿，有文章過有佢親筆畫个圖，當詳細。
有一種大陸客人講个黃粄，就係台灣客話个梔粄，係用黃梔樹桍燒灰，濾出黃梔水浸米打个粄仔， 愛冷冷食，熱天食起來透心涼，原在耕田个人，蒔田、挲草、割禾該下㧡點心盡輒打來食。
這下人䌈焿粽大體用化學个焿油，已毒，輒常新聞會報講，有个大人無下落，將用伸个焿油儘採放，細人仔毋知頭天拿來食，歸個喉嗹胲燒到壞壞，食較多个連胃腸就會燒著。還過，原在莊下人煠焿粽會放兜仔硼砂，粽仔較毋會黏粽葉，食起來較虬。毋過硼砂有毒，下後政府就規定做毋得拿來煮食。
有一擺聽鄭奕宏校長講，厥倈仔細細聽厥婆講：在青柿仔蒂頭點焿油，翕幾日仔就會變到紅柿仔。等佢去讀大學時節，有一日買幾粒仔青柿仔，照厥婆講个在蒂頭點gi iu放在衫褲肚項去翕，過咧幾下日，佢拿出來看，本本青青，佢就打電話問厥婆，老人家問講：去哪買个焿油？佢應講：odobai店啊。老人家緊㖸緊講：䌈焿粽用个焿油，毋係odobai个機油。
做仙草又乜會用着焿，毋過係用焿油，焿味會忒重，毋好食，就愛濾灶空个火灰來合仙草。還細時節，見有用禾稈抑竹杈結煮三餐該下，吾姆會同灶空个火灰集起來，等炆仙草該下拿兜仔來濾水合，合好吔還溫燒溫燒仔，會喊𠊎㧡去大圳漂冷正來賣，逐擺兩下半就賣淨淨。
這下怕無幾多儕會自家䌈焿粽了，莫講會燒焿仔，做焿油。係講有一日，有人去odobai 店買機油轉來䌈「機粽」食，該就壞蹄了哦。
