面衫摎裙仔
【文／林以晴】
發音人：日棈（海陸腔）
「敗勢𠊎無變成你兜想愛个樣仔，敗勢𠊎好著裙仔，毋好著你兜希望𠊎著个面衫， 乜敗勢𠊎成人長大了，毋想愛再過行你兜鋪好个路了，𠊎就係𠊎！愛過𠊎自家个生活。」 表哥寫下了這段話，雖然毋知佢个爺哀這下係仰般个想法，毋過𠊎明明確確了解了，佢 毋會再過在意這社會設定好，安到「正常」个門檻，這規定細倈仔淨做得好細妹仔，戀情正做得得着大家个祝福。
記得第一擺聽表哥講這兜事情係在捷運項。可能係因為𠊎兜淨差一歲，從細共下搞，大了還係輒常打嘴鼓；可能係因為佢毋知愛摎麼人講，心肝頭拶拶；乜可能係因為需要有人分佢支持，所以就拿出手機仔，分𠊎看該張對佢來講盡有意義个相片—著等裙仔， 戴等假頭那毛，目珠裡肚裝淰个信心摎幸福，係𠊎從來毋識看過个。該量時，表哥摎𠊎講，厥阿爸阿姆都還毋知這件事，保守个家庭還無辦法勇敢面對。𠊎就開始想：「假使爺哀都做毋得偎靠，敢毋像細船漂泊在大海？係講試著孤栖，毋知愛仰般行，又愛仰結煞正好？」
幾年以後，表哥離開屋下，離開該隻對佢期待忒深个所在，來到自由自在个大學。 在這位，無人會管佢愛著面衫抑係洋裝，乜做得留等又烏又長个頭那毛。有一擺表哥來學校尋𠊎食晝，因為驚同學會用毋友善个目光看佢，所以𠊎就當緊張在該安排時間摎位所，盡量莫分佢兜有機會堵著。毋過好得係𠊎想忒多了，可能因為有學過人文社會个科目，同學都毋會試著奇怪，淨想講佢係在做cosplay，表哥乜毋會試著毋自在。這件事情忽然間分𠊎發現，原來在該時，𠊎正係認為表哥著洋裝毋「正常」个人，正會毋想愛分別儕看著𠊎兜行共下，甚至毋願意分同學知：「這係吾表『哥』。」
還有一擺過年个時節，親戚朋友都轉阿婆屋下團圓，舅姆一看著表哥就講：「頭那毛恁長，無怪係理科个學生仔。」聽著這句話，有兩種心情輪流在心肝肚大聲喊，一開始係放輕鬆了，因為無分大人發現；毋過又敨了一口大氣，因為原來長頭那毛，對大人來講淨代表「細妹仔」或係「理科个學生仔」。在大家講愛去西門町逛街个時節，我就摎阿哥提議去看耳環，「哪有細倈仔戴耳環个？恁樣看起來毋係盡像同性戀？」阿姨一句話，打斷了我兩儕熱烈、期待个討論，就像拿歸面盆个水來潑番仔火。第一擺去到西門町，麼个店都毋想入去，頭前个心情變成天邊个烏雲，毋知有幾希望落一場大水，洗忒大人傳統又傷人个觀念。
到今，大人个態度還係無改變，毋知係毋想愛看著事實，還係正經麼个都看毋出來。毋過𠊎知表哥既經脫忒面衫，乜擲忒長輩在佢肩頭安好个石牯，準備好愛著等帶來信心个裙仔了！社會个門檻對佢來講，就淨係當多建築个其中一個，毋使特別去管，看一眼， 對邊脣行過就好，繼續行在自家鋪好、自家想愛行个路
得獎感言：
首先想愛感謝評判先生賞識𠊎个作品，𠊎正有機會摎更加多个人分享，再過來想愛感謝在𠊎學習客語路項，所有摎𠊎𢯭手个先生：毋管係渡𠊎練習个先生，還係分𠊎尋著方向个先生，當然還有總係支持𠊎个屋下人，假使少了佢兜，𠊎可能就逐日閒亍亍仔，還毋知未來个路愛仰般行。最尾但係乜盡重要个就係𠊎个親朋好友，係佢兜成就了𠊎生趣个生活，帶來了靈感。承蒙大家！
