殺夢打拚
【文／何承道】
得獎感言：何承道（南四縣腔）
又落雨了。
水氣出毋去，壁項同夢想聚概發毛生菇。這屋下雜又亂。恁落後恁老舊，你个未來毋在這位。無可能歸來哩。
衫褲收揫了。七月半。屋下禾埕擺等豬羊雞鴨、三牲水果渡孤。你單人獨馬渡到遠方，在看毋着个所在尋未來。你對大城該片看去，一片暗摸胥疏，烏醹到像烏水溝恁樣。昏黃个路燈仔照出，在窗仔門映出你个樣式，盯等發譴、孤栖又堅定个自家，你想著阿爸哩。
該央時阿爸嘎你共樣風神華華，在个改上改下个後生時節裡肚，看毋慣屋下老規矩，同大人儕緊吵緊罵。到後逃離屋下，出庄打拚。在外流漂。後生个阿爸發過死誓絕毋歸去，絕毋歸去該壓死後生人个老庄頭。佢忍等孤獨。在台北無人講客無人聽客，高不而將講無流利个學老話同華語。一擘嘴講客就會想著該殘暴橫行个屋下。該係一生到死都毋會結瘌个傷口，一碾著就會痛啊愛跌目汁，將就庰到心肝肚。後來阿爸做生理分人騙，屋仔工廠地泥全無核。歸轉屋下，擎钁耕田。
你準備離鄉了。你乜佇毋著庄頭个淒涼同敗壞，新時代个所有同家鄉無半息關係。你愛背離屋下出去打拚，添放核從細到大个印象，去做一个跈等時代个後生人。毋過你忒毋知好死。你看著阿爸个形影，聽等佢四四散散个故事，得知佢後生个落魄。下一个天光日都毋知哪片，哪敢望有日做得衣錦還鄉？佢淨煞猛打拚，在該紅毛泥做个森林裡肚開山打林，開出一個細細所在，過一日算一日。煞猛，煞猛，聽起來盡像華語个「殺夢」。阿爸歸屋下後，煞猛打拚過生活，殺核佢自家後生時節个夢，變做一個大樹仔，腳下生根挺等風雨，殺核飛入天頂个夢。
「亻厓煞猛恁久，到尾項，自家个夢全死核了。」爸敨大氣講等。
你看著阿爸，循等家譜尋到祖祖宗宗，逐逐都有離鄉个夢想，儕儕都在異鄉殺核自家个夢想。「殺夢」蓋像融入代代子孫个血脈，百年千年來，殺自家个夢殺毋停手。該息譴閼，為著夢想單儕離鄉打拚个後生形影，在長遠个時空裡背來來歸歸，逃離梅縣个來台祖、搬離祖屋个阿公、背離家鄉个阿爸，還有你。
你等盡命牯逐夢。扡毋過現實係暗摸浪湧个烏水溝，該載滿夢想个細船會分浪貶核。你等毋係變做《渡臺悲歌》裡背个孤魂野鬼，就係到新所在艱難生存。苦難從來毋曾過核哩！淨變形換貌在時光裡肚消蝕你等。你等續等在時代个溝縫裡肚生存。為著生活開始講別人个話，講別人个古。光彩晟眼个城市餳你等，喊你等勒等自家个夢想，到該片㓾核獻祭分佢，夢想个屍骸堆山塞海，像七月半拜孤魂野鬼个三牲水果，毋過你等个夢，死後乜無人祭拜。
你一𥍉目發現故事仰會恁像，甚至共款共樣。
就算忒多人為著生活煞猛打拚，毋過就係該息死核个夢，砌築了現下个好生活。你定定仔摸廳下个壁，冷泧粗硬又磨手，嗄係代代人夢想个傳承，你看著阿爸个身影同前人合做共下，砌成這個屋下。在流流漂漂个路途項尋一個所在，安身立命，煞猛打拚，為著你起屋遮風擋雨。佢等个夢死核，嗄尋著保護細人仔个新夢想。故所佢等毋嘆毋怨，擎起钁頭，殺夢，打拚。
你仰還恁硬頸呢？還係去坐去到大城个車仔。三更半夜个高速公路項，一粒粒昏黃个路燈，盡像渡孤放个水燈。你掠過逐個死核吂超渡个夢想，聽等佢等个辛酸艱苦。你做毋得分佢等嚇著，你愛續等進前，就像該息渡烏水溝來臺个祖宗共樣，你定愛在大風大浪裡背穩等圓身，用夢想點光船頭帶路个油燈。
車窗外背發風落雨。你看毋著頭前，乜愛定定仔對前行。你到死乜愛渡過面前个暗烏同狂風暴雨。敢怕你个夢想到尾，會像阿爸阿公老祖宗共樣全全死淨乜毋驚。你像到佢等，儕儕都係硬頸仔。
你想愛飛到天頂，去看佢等無看過个景色。
「到台北，就會天光了。」你細細聲同自家講。
得獎感言：
大家好，亻厓安到何承道，今國立中央大學客家語文暨社會科學學系二年生，係高雄楠仔仙月眉庄人。感謝這擺文學獎个評審先生。做得接受亻厓恁實驗性質个文章。《殺夢打拚》係亻厓想愛在該古老客話裡肚，用想像同聯想做客話个新樣式，去講亻厓等自家尋夢、㓾夢、生夢个故事。係講頭擺人無愛殺夢、無愛煞猛，亻厓等乜無機會好去尋夢。亻厓感著亻厓等後生人毋單淨愛傳承，乜愛分該客家話新詞新意，去講亻厓等个故事。
最尾。感謝阿爸、吾媽。還有鼓勵亻厓創作个菊芳先生。無你等，這個文章毋會寫出來。多謝。
