楊梅「保甲古道」休閒、保健兩相宜
【文、圖／徐貴榮／國立中央大學客家語文暨社會科學學系兼任助理教授】
發音人：徐貴榮（四縣腔）
楊梅「保甲古道」從老莊路往龍潭个左片783巷落去（圖1），右片路脣也看得着當清楚个指示磚楯牌（圖2）。
圖1 老莊路783巷入口
圖2 右片路脣个磚楯指示牌（2022.5.10攝）
做麼个安到「保甲」呢？因為這係兩百零年前，清朝手仔實行「保甲」制度該兩時，每一戶出一個壯丁「奉工」修好留下來个，安到「保甲路」。當時楊梅老坑、店仔湖一搭仔還吂有對外聯絡道路，這條路做好過後，係當地透埔心食水坑、頭重坑唯一个路。也係新埔人㧡柿仔、柑仔、茶米、茶油到大溪賣个路，故所後來又分人安到「㧡擔古道」。
這條古道本來全長20公里，後來因為鐵公路發達，㧡擔个人毋使㧡到會死，愛去龍潭、大溪个人，也毋使在這跋崎行到會死，這條「保甲路」就慢慢仔荒忒吔！民國103年6月个時節，當地个永寧里里長黃耀昌先生試着當打爽，就帶等二十零個里民，照等古道原來个樣式，客家傳統个工法，在老坑溪搬運鵝卵石頭，一粒一粒仔空手扐上去去鋪。將頭擺一公尺个路拓寬到兩公尺半，邊脣結石駁（圖3），中央鋪較大粒个石頭，脣項用細石頭固定，路脣還加鋪石板（圖4），拂忒半年个時間到11月完成，修好700公尺到陽光山林社區為止。恁樣雖然多工費氣，毋過保留祖先留下个智慧，透水性較高，還較做得水土保持，也毋會破壞原生物種个生存環境。目前還變成楊梅盡靚个裝置藝術，珍貴个文化資產。
圖3 歸路仔路脣上站結石駁，兩片種苦茶樹
圖4 步道最頂高个石板路
入口石壁項有一個「百年薪傳保甲古道」介紹看板，左手析有一戶人家當熱情，設有「奉茶亭」，分遊尞人客準備起行，抑係下來好食茶、坐尞。古道一開始就上崎，這崎講毋陡也算陡（圖5），歸路仔蹶等上，係講蹶當遽，保證蹶到汗流脈絡。係講慢慢行，慢慢仔上，正700公尺定定，大約半點鐘就行得透，大人細子無問題。對一般人來講，當做休閒、保健當堵好，也有遠位人聽着名聲來个。
圖5 入口个鵝卵石路。
圖6 歇腳亭（奉茶亭）个圖說「楊梅客家生活圈」。
歸路仔樹仔高天天，五月還有桐花片片落下，行起來涼沁涼沁，麼个熱天也毋會試着熱。路脣兩片大部分種油茶樹（圖3），成下仔也有竹仔，遠遠看啊去，茶園、樹園、草園、歸片大自然。行在路上，時時也聽得着鳥仔、蟲仔、蟬仔个叫聲，聲聲入耳來鬥鬧熱、做伴，一儕人行也毋會試着孤栖。行無幾久，有一座「解說亭」好尞涼，了解古道个歷史文化。到盡尾頂高還有一隻「歇腳亭」（圖6），脣項有圖說說明「楊梅客家生活圈」个內容，包含老樹同伯公、茶樹同灌溉這兜。企到在這看啊下去，看得着楊梅街路，也做得看過對面山排頂青莠莠个揚昇高爾夫球場。
從歇腳亭到盡尾百零公尺全係平路（圖4），在陽光山林社區入口就愛斡頭倒轉來。係講無愛跈古道原路轉，也做得在較頭前兜仔个「森林步道」下來（圖7），到渡假村入口又乜700公尺。這森林步道本來係東森山林渡假村个私人步道，毋過這下開放免費咧！歸路仔樹仔還較高，乜有鳥聲、蟲聲，還有植物解說牌，經過人工陂塘、牽手橋、夫妻樹、動物園區、左岸森林、渡假酒店大門，也有一番景致。下到酒店頭前老莊路行上古道入口，捩一圈差毋多2000公尺。當然也做得在這渡假村上去（圖8），從保甲古道下來。
圖7 東森渡假村「森林步道」從高處入口
圖8 從東森度假村上去，這下免費開放，入口看得着劃忒个入內請購票100元。
保甲古道這下看毋着頭擺人㧡擔个辛苦咧！顛倒係常來休閒遊尞个人。相對於楊梅另外福人、秀才這兩條休閒步道來講，還較有歷史文化、人文風情，分人想起頭擺人个辛苦、智慧。長透去行，體會大自然，行遽、行慢全做得，散心休閒、身體保健兩相宜。
※本文的「着」，同教育部訂的「著」之意。
