庭前生瑞草 好事不如無
【圖／廖千慧；文／何石松】
發音人：何石松（海陸腔）
庭前生瑞草，好事不如無，意思係講屋面前，突然生一叢靚靚介瑞草香花，表面看起來係一種好頭彩，實際上，這種好事毋係最需要介，有，毋當無。
聽講，四川人當好在屋面前柵籬該位，種兜瑞草，藤仔递到兩三尺長，大家都當珍惜。有人評讚講：深青色介草藤，紅青紅青介花蕊，圍等這座瓦屋，種在庭前，人人珍惜到祥瑞共樣。
仰般受著大家歡迎介瑞草，有人講無較贏，有人又當疼惜，可能斯怕有兜仔所爭。
首先，就係佢生毋著位所咧。所謂庭，就係門前介禾埕，該係大家愛行介地方，人客坐尞，敬神，做好事請人客介位所，人客來來去去，尖來尖去，你半中央嗄來一叢花，該毋係杈杈撐撐，當無方便乜。
係講生在庭前石罅仔，毋會杈人，該也做得。聽講三界爺介天官，就係堯該當時，有一種安到蓂莢介草，生在庭前石碫漘介縫罅肚，逐隻月初一開始，一日生出一莢，到十五，就十五莢，等到十六日開始，又一日謝忒一莢，到月尾，就全部跌淨淨，下隻月又從頭開始。
聰明介堯，就拿來做一隻月三十日介想法。這件事情，也有人提出疑問，所以，後來除了宋朝符瑞志認為係好頭彩外，就儘少聽著石碫生瑞草介事情，因為，頭擺人講：「宮室之中，生草就除」。可見庭前瑞草，可能毋係瑞草，早慢愛除忒。
雖然，自古以來，常有人提出瑞雪，瑞草，瑞獸出現，認為係太平盛世介象徵。但係，正經仁民愛物介君主，可能毋係恁樣想。清朝康熙皇帝就認為「慶雲景星、嘉禾瑞草、天書麟鳳這兜奇妙罕得看著介東西，摎百姓係無麼介關係，也毋係𠊎所關心介，還誇誇滾講係祥瑞，係會分人笑介。」可見，瑞草不管生在哪位，都無重要，因為，該摎百姓無麼介關係，正經有無都無相干。
也有人講，庭前生瑞草，係來自一隻民間故事。
聽講頭擺有個後生人，帶等所費上京考試，無想著，一去斯就像「斷線紙鷂」共樣，毋會轉咧，厥餔娘在屋下等到歸年，一直都無消無息，無聲無哨，當久以後，愁勞到無落無著，舂上跌落。行出外背，就在該「手攀綠竹想對想」；轉到灶下，又係「幾多暗切無人知」，愁丈夫，愁到心茫茫；想老公，想到懶停動。姑不如將，就決定上京去千里尋夫。佢來到一隻位所，當鬧熱，有一大群人圍等在該看花。該花開著當靚，靚到耐毋得，該花毋單靚，又像紙做紅花樣，開了半年咧，還毋會謝，恁好名聲傳到滿天下，連皇帝都知咧，還特別來看，看著歡喜，就下聖旨摎佢安名，安到「瑞草」。
該千里尋夫介餔娘也在該看花，一聽著「瑞草」介名仔，心肝頭掣一下，目汁就跌下來，恁堵好，跌在該蕊花上，玄風之間該蕊花就謝忒咧。主人看著心愛介花萎謝忒，愛監佢賠，大家也試著奇怪，仰般佢介目汁會使著這蕊花謝忒，這一定有奇故，所以，就移送到官廳去，來辦這件事情。
原來厥老公介名仔也安到瑞草，去上京參加考試，雖然身上無當多珍珠瑪瑙，也有兜仔金銀財寶，來到這位，吂去考試，就分人謀財害命，毀屍滅跡，埋在這庭前介水井肚，然後斯摎這水井囤起來，無想著頂高嗄生出了瑞草，又毋會謝，一直等到餔娘尋夫前來，正顯靈謝忒。
官府就抓捉著這隻蒂頭，調查瑞草上京路線，斯停在這隻位所，就無再過向前行咧。又發覺著生瑞草介泥仔像係新土，摎漘頭無麼介共樣，就開挖瑞草，正知這原本係隻水井，厥老公就分這間屋介主人，謀財以後埋在井肚咧，衰過介瑞草，就恁樣「古井燒香──暗跼煙(屈冤)」啊。
就近介人，了解以後，就指等這間屋講：庭前生瑞草，好事不如無。
※本文故事，感謝黃玉妹老師提供。
※本文的「介」為大眾通用的「的」，同教育部訂的「个」之意。
