海洋客家文化
【文／賴文英／國立中央大學客家語文暨社會科學學系兼任副教授】
發音人：賴文英（四縣腔）
桃園新屋係全臺灣唯一个海洋客家文化地區。其中，新屋蚵間石塭仔群，根據文化資產保存法，在2019年登錄做「文化景觀」。
蚵間石塭仔群，係清朝時期起个，佢用在地石牯──卵石，在淺水項一隻一隻仔疊起來，透過流水个變化，正建構出老古時代打魚仔个方式，係人類生活智慧摎自然互動个文化地景。彎彎斡斡个景觀，形投乜像魚鱗，分佈完整，當罕得看著，故所當有紀念性、代表性，也有歷史、文化、藝術、科學个價值，也有對土地永續利用个價值。
利用新屋、觀音海洋客家文化做為基礎，摎永安漁港、藻礁，還過就近仔个客莊老屋、廟、美食等等，做一隻結合，形成海洋客家產業線，深根在地文化、海洋文化。
比論講漁港這位，佢早期有警察局摎宿舍，在後轉型做「新屋石塭故事館」，有環境教育个意義，傳承百年石塭仔文化。
本旦係軍方海防基地个所在，在後也改建做全臺灣第一座「海洋客家牽罟文化館」，分民眾瞭解客家先民因應自然生態打魚仔个方式。
還過，因爭漁港、牽罟、歕都、石塭仔，都係在地傳統打魚仔个方法，故所起出海螺形式个「海螺文化體驗園區」，中央个地景藝術反映客家噴都聲个意象，園區脣也表現出石塭仔个形式。
另外，這搭仔還有「觀新藻礁生態系野生動物保護區」，這片个藻礁分佈當闊，生態乜當豐富，斯有七千零年个歷史囉！
整體環境來講，新屋這位有淰淰个海客風情，來這遶尞，定著做得分大家過較瞭解海洋客家文化。
