萬巒有機書店
【圖／書店臉書粉專、文／薛常威／國立中央大學客家語文暨社會科學學系在職專班碩士】
發音人：薛常威（四縣腔）
屏東萬巒係南部當重要个客庄，係六堆裡背肚个先鋒堆，萬巒毋係單淨豬腳有名定，客家夥房乜係當地个一大特色。今年四月，鄉公所摎社區觀光串聯發展，促進夥房活化，摎泗溝林家總理夥房變成一間有機書店摎客店。
萬巒本來就有兩間圖書館，一間青創中心，這下加上這間「萬巒有機書店」還較做得推廣鄉下讀書个風氣。伙房外牆有一幅看板寫等「在書店裡，遇見獨特的靈魂」，這段文字說明了「萬巒有機書店」个內涵摎價值，這下變書店翕相打卡个熱點，書店在偏鄉落腳係希望分偏鄉細人有較多讀書个機會，摎其他書店無共樣，「萬巒有機書店」係一間無賣書，係用換書个方式，分書去旅行，交換帶走書店一本書，捐出20箍，分書店永續經營，做著推廣讀書个目的。
書店乜有請客家歌手來唱歌，分民眾享受音樂摎讀書个雙重樂趣。乜做得在忠孝堂夥房，聽副大總理个故事，認識客家歷史鄉土文化。
熱天店內還有牛耕米冰摎仙草冰好食，享受牛耕米搭配黑糖熬煮个古早味，當歡迎大家來萬巒讀書，行尞，體驗夥房个生活。
店長羅秀玲有舉辦一週一會，當歡迎大家來尞，共下討論地方摎書店个想法，希望做到摎社區居民共好。
