中央大學電子報

榮榮係樹花抑草花

【文／羅肇錦／國立中央大學客家語文暨社會科學學系榮譽教授】

　　 榮華兩隻字，自古以來係大家相爭拿來安名个漢字，無分男女無分族群，所有採用漢字安名嘎下，最早考慮个毋係「榮」就係「華」。中華、華妹、華人、德華，這兜「華」个本意就係花，又像榮華、榮光、榮昌、榮祿，這兜榮个本意也係花。「華」係花，「榮」也係花，該「華」同「榮」兩種花有共樣無？根據《爾雅．釋木》个解釋「榮，桐也」意思講「榮」本來係桐仔樹，〈釋草〉講「木謂之華，草謂之榮」意思講樹仔个花安到華， 草仔个花安到榮。這種解釋搣到人疑疑糊糊，因為「華」「花」兩隻字就有草字頭故所「花」「華」就係草仔，顛到「榮」字下背係木字片，故所榮字愛樹仔正著。何況〈古詩十九首〉講「攀條折其榮，將以遺所思。」陶淵明〈歸去來辭〉：「木欣欣以向榮」這全全講「榮」係樹仔花。綜合起來看，可能係唐朝以前「榮」係樹花，唐朝以後「榮」正變草花，像白居易詩「離離原上草，一歲一枯榮。」可見用漢字輒常意思會變來變去，用字个人一時想榮一時又想華，一時講草一時又變花，樹草榮華花花草草。這兜爭論帶到客話來看，亻恩講茄苳樹葉生到榮榮無就講牛眼樹花開到榮榮，較罕得聽人講草仔生到榮榮、菜瓜花開到榮榮，較輒講个係草仔生到塞塞、菜瓜花開到當紮。故所客話「榮榮」係講樹仔花毋係草仔花，保留較古个意思。

　　箕山个花花草草開開落落，差毋多係春生秋死，打有果子就秋死冬藏。樹草壽命全比毋無得，樹仔做得百千年一生滅，草仔僅可一歲一枯榮。人同一般動物个壽命，做得講比上不足比下有餘，正經係人窮志短草死樹還生。故所崖用大細目看萬物逆旅，嗄變到對樹仔珍惜愛護，對草仔个生死全無打眼。十過年來个空山歲月，淨看崖邸該種樹仔，罕得看崖劈樹仔，淨看崖打草仔罕得看崖種草仔，這就係大細目看人，樹草兩樣心。下背退轉平平草仔个立場，正會清楚草仔也係箕山个百代過客。

　　箕山草，毋係寶，但係無這兜草，崖就無辦法在箕山過安心个歲月◦第一草係遞藤个瓜仔：有冬瓜、番瓜、苦瓜、菜瓜、弔瓜、艻瓜、香瓜、西瓜、匏瓜、香緣瓜。第二草係食葉花个青菜：有高麗菜、角菜、白菜、蕹菜、莧菜、甜菜、芥菜、花菜、快菜、弔菜。 第三草係食地下莖个：有芋仔、番薯、蘿蔔仔、馬鈴薯、番豆，藕薯、涼薯。 第四草係豆仔：有長豆仔、黃豆仔、田豆、鵰仔豆、荷蘭豆、樹豆仔、狗爪豆。第五草係配香料：有𧊅絲、七層塔、芫絲仔、蔥仔、蒜仔、當歸葉、芹菜、茴香仔。第六草係做藥又做菜个：有丹蔘、薑麻、狗貼耳、鈕仔草、金銀花、金針花、山蕒仔、蝦公夾、仙草。第七草係果子：有番茄、西瓜、時計果、刺菠仔、香瓜、葡萄、無花果。這七種花花草草瓜瓜果果， 全部係空山一年个過客，崖逐年就看佢兜來來去去。毋過，臥起頭那櫹楠、羅漢松又乜逐年就看崖在箕山來來去去。

　　草仔一生人，儕儕就經過點仁、暴芽、生筍、抽莖、遞藤、生葉、開花、 結子、落蒂个過程。成熟个果子底肚又有留種傳代个果仁果核，一般講「核」係樹仔打个果子正有核，核較大粒，搭一粒果就淨一粒核，像牛眼核、橄欖核、桃仔核、梅仔核。係講「仁」就當細粒，係草仔藤仔打个子，一粒果子剝開來，肚項就有一排排个仁，像番瓜仁、番豆仁、莧菜仁、豆仁、菜仁。講到這，崖要特別請木瓜來見證，因為木瓜名稱就講佢係樹仔，又係瓜仔。毋知愛將佢納入樹仔抑係草仔？崖想答案當清楚，將成熟个木瓜破開來看，係正一粒核該木瓜就係樹仔，破開來係講當多仁該木瓜就係草仔。

※本文的「崖」同教育部訂的「𠊎」之意。