中央大學電子報

堵着好朋友


【文、圖/鍾榮富/南臺科技大學應用英語系講座教授】


Your browser does not support the audio element.
發音人:鍾榮富(南四縣腔)



   初到香檳,帶等滿滿个新鮮、好奇个感覺,朝晨頭去看佢等个農夫市集,看着佢等種个菜,色形當多種,鮮紅、淨白、有藍有綠,大大細細擺共下,足滿好看,足滿靚鬧。雖然毋知得愛仰仔煮,毋過淨看都會感覺着滿足。當晝頭出去尋食,特別選有美國農夫菜个店仔,想愛食看啊朝晨看着个菜,愛仰般料理。無想着送來个沙拉,親像各種菜色都有,大枝大芽,略略仔看得出係哪兜菜,食起來味緒還特別。

   前幾日還帶等暢樂个心情,悠悠蕩蕩,這行該行。無兩三日,新鮮感就脫落了,消失無形,顛倒想起遠在天邊个姊仔同細人仔。每日臨暗到來,大地一片烏暗,燈火在遠遠个地方,𥍉啊𥍉仔,小小个農鎮一下仔全歸到恬靜。無鳥聲、無人聲,原來這就係𠊎未來愛過日仔个所在。𠊎匆忙出國,連半點仔消息都無打聽,故所來到這,無人相識,乜無朋友。每日斷暗以後,入了間房,孤獨、寂寞變做日常。

   開學以後,更加痛苦,因為學業盡毋順利。教室內,先生講个內容完全聽無,連佢講个英語都聽無幾多。𠊎本來對語言學就無興趣,當年讀大學个時,語言學概論正堵好及格定定。畢業以後一心教書,教補習、接家教,日夜無閒,完全無想着有一日會來到美國心臟區荒野个小鄉鎮讀書。英語盡少講,盡少聽,自然無辦法聽識。上課个內容更加聽無,基本个背景毋夠,英語又生澀,每擺上課都走空轉。下課以後,毋識半個人,想愛問人乜無從問起,只好拿等書,埋身圖書館。下晝邊入去,半夜正歸屋。

   語言學,同文學無共樣,毋係有讀就會个,輒常讀到書都會爛仔,還係毋知在講麼个。在圖書館,拚命牯讀書,完全無效用。恁仔个生活,蒼白、無聊、孤寂,親像每日都在浪費生命。有一日,對圖書館出來,堵着共班个後生仔,佢同𠊎點頭,𠊎同佢點頭,平常就係恁樣。無想着該日,佢問𠊎讀到仰仔了?對音韻學有麼个感想。𠊎同佢講自家个問題,可能壓抑忒久了,𠊎煞講毋停。佢定定仔聽𠊎講,慢慢仔拿書同𠊎解釋,同時佢講會每禮拜四下晝,請𠊎食咖啡,同𠊎解釋課本同課堂上無清楚个地方。後來,𠊎正知佢係牧師,佢讀語言學个目的就愛去非洲傳教。

   吾這位同學,毋單淨教𠊎書本个東西,還帶𠊎去教堂,去認識當地个農民,帶𠊎去摘蘋果、去摘藍莓,去了解美國清教徒个生活。可惜佢第二年就離開香檳,去傳教了。離開前,佢同𠊎講,厥願望係有一日在教堂堵着𠊎。可惜,到今𠊎還係無受洗信教。

   美國人个生活、看法、價值觀,同好來烏電影中表現个無相同,愛有門路、有朋友帶,正可能進入平常人家个屋內,了解佢等个生活。

返回上頁

◆ 發行單位 / 國立中央大學客家學院
◆ 榮譽發行人/ 周景揚校長
◆ 發 行 人/ 周錦宏院長
◆ 編輯顧問 / 王俐容老師、王保鍵老師、江俊龍老師、 周錦宏老師、姜貞吟老師、孫 煒老師、 陳秀琪老師、陳定銘老師、張翰璧老師、 黃菊芳老師、賴守誠老師、鍾國允老師、 劉小蘭老師、蔡芬芳老師、鄭曉峯老師、 羅肇錦老師。(依姓氏筆畫排序)
◆ 主   編/ 周錦宏院長
◆ 執行編輯 / 黃菊芳系主任、邱一帆老師、賴維凱老師
◆ 編 輯 群/ 林芊慧、陳婕如、彭淑姿、彭賢明、劉虹均、賴亞華、羅玉芝。(依姓氏筆畫排序)
◆ 刊頭攝影 / 廖千慧
◆ 網頁製作 / 李岳哲
◆ 連絡電話 / 03-4227151#33480

Alpha Preparation, Stand by

Facebook
twitter
line

© 2020 New Edition Design by 李岳哲

Webversion   |   Unsubscribe