倉鼠同學
【文、圖／葉金華／永和國小教師】
發音人：葉金華（四縣腔）
輔導室舊年12月去愛鼠協會認養个倉鼠，渡轉來學校正無幾久就做阿姆了，降了4隻細倉鼠。𠊎問同事講「做得分𠊎一隻畜無？」就恁樣，吾班項多了一隻正斷乳个倉鼠同學。
這隻細倉鼠尾短短仔，面項个鬚菇長長，烏金烏金个目珠捩捩轉、歸身毛絨絨，生著花喇必駁，底下係白色、頂高有咖啡色，背囊項還有一隻圓圓个記號，看起來盡得人惜。班項个小朋友下課時節圍過來，相爭講愛摎佢安名仔，還有細妹學生用手輕輕仔拍等塑膠籠、溫柔个唱等歌仔，講愛揞佢睡。𠊎摎小朋友共下討論，全班投票選出「細毛球」做厥名仔。
細毛球歇在塑膠收納箱，裡肚有滾輪、水罐、鋸屎、放食物个細碟仔還過便所，毋過佢嗄摎便所準做睡目个竇，當好囥在裡背。𠊎上網去尋資料，了解厥食雜還過生活習慣，成年个倉鼠有兜仔孤老，一隻籠仔單淨做得畜一隻倉鼠，係無恁樣，佢兜會相打泌背。因為低年級个小朋友較毋知輕重，若係毋堵好分倉鼠咬着就慘了，還係做先生个𠊎來負責照顧較妥當。日時頭佢跈𠊎去學校上課，暗晡頭跈等𠊎轉夜，𠊎還買了一隻塑膠球分佢搞。寒假一過忒，𠊎摎佢帶來學校个時節，小朋友看着佢就笑咪咪仔講：「哎喲！仰會大恁遽？正過忒年，這隻『細毛球』變『大毛球』了！」
世間个事本旦就無公平，共樣係囓齒類，尾長長个老鼠盡得人畏，有關老鼠个諺語像「猴頭老鼠耳」、「畜老鼠咬布袋」這兜都係較負面个講法，厥親戚像倉鼠、飛鼠摎膨尾鼠這兜動物就生著已得人惜。因為倉鼠當好摎食个東西塞到兩片个面頰卵肚，再摎食物帶轉去囥起來，故所安到倉鼠。一般來講，倉鼠个壽命差毋多正兩年定定，佢一日愛睡16點鐘，像目睡鳥大部分个時間都在該睡目，毋過佢當醒睡，脣項係有麼个聲就會醒過來。倉鼠睡醒伸懶筋、擘嘴擘鼻个時節，你做得看着厥又尖又利个牙齒，最好愛摎佢保持安全距離，若係無細義會分佢咬着。
倉鼠个視力聽講無麼个好，上擺晨光時間𠊎摎倉鼠放在塑膠球裡背，分倉鼠在教室个地泥項行等尞，吾班項个小朋友摎手指伸入縫仔，想愛摸倉鼠，倉鼠可能恅着小朋友个手指係做得食个東西，就摎佢咬下去，𠊎看着小朋友个手指流血，遽遽喊佢去健康中心，好得無麼个要緊，護理師摎小朋友膏藥仔、用ok繃包起來。𠊎打電話聯絡家長，乜摎班項其他个學生仔做機會教育：愛保持安全距離，尤其係對該兜生毛面个動物，做毋得看着佢兜生著得人惜就儘採偎近去撩弄。
「這隻倉鼠同學毋係問題學生仔，也毋係有暴力傾向，大家愛用正確个方式對待佢、互相尊重，正毋會發生傷害喔！」𠊎在班項宣導，希望大家做得和挼共下。生命教育就係愛尊重每一個生命，用智慧个角度來看事情、解決生活當中个問題，敢毋係？
