中央大學電子報

「客人仔猴」──民視節目來賓恁仔講客人

【文、圖／彭欽清／國立政治大學退休教授】

　　 2005年二月二十六暗晡六點零邊仔去丈人老屋下，佢這兜當在該看民視个「愛情Hotel」節目，係吳淡如小姐同謝震武先生主持个。

　　 該暗晡个節目係針對打脫事過同餔娘抑老公無在个人設計个，主持人同來賓大體講Hoklo，其中有一個婦人家問一個男仔人係客人無？對方講毋係，主持人跈等問該婦人家仰恁仔問，佢應講：「𠊎毋嫁客人仔猴。」兩個主持人過現場看个人聽著大㖸，電視畫面項寫講「以上言論不代表本台立場」恁多隻字。主持人又再過問做麼个會恁樣應，該儕人講佢死忒个老公係客人，對佢盡壞，故所無愛再過嫁客人。

　　 該個婦人家婚姻恁不幸，相信觀眾都會思量佢，也會體諒佢講出這種話。毋過，一個以Hoklo為主个無線電視台將恁歧視客人个話公然播出，實在會分人疑狐／民視同兩個主持人个心肝肚到底有客人無？

　　 轉到屋，煞煞打民視觀眾服務專線，請負責接線个小姐將吾个不滿轉告分有關單位，𠊎還留下連絡電話。二十九日下晝民視行政組組長打電話來問詳細情形，緊會失理，講佢乜係客人，應講會通告各製作單位做毋得再過發生這種事情。𠊎請佢分𠊎該隻節目主持人个連絡方式，𠊎愛自家來同該兩儕溝通，佢講毋方便。

　　 從該節目播出个方式看得出係先錄影个，既然錄影，製作單位同主持人在發現有恁看毋起客人个字眼出現該下，做麼个無煞煞處理，顛倒在該哈哈大㖸？淨在畫面打出「不代表本台立場」个字眼效果有限透，因為當多看該隻節目个老人家毋識字。兩個主持人都係社會菁英，對恁魯夫个話語還笑得出來，莫怪一般大眾輒輒會欺負其他个族群。

　　 在台灣有已多Hoklo人，動啊著就講「客人仔」、「客婆仔」、「番仔」、「番婆」，「大陸仔」，「中國豬」，「外勞仔」，同外人全看到斜斜。「客人仔猴」恁傷客家族群个字眼，竟然公然在民視拜六熱門時段/預錄个節目中出現，分人有還係在原始社會个感覺。

　　 一個社會文明無，做得對社會優勢成員對非我族群（含性別、族群、職業、體態、容貌、貧富）个態度就看得出。2005年年初，哈佛大學校長桑默思在一場研討會項提著，在理工方面／細妹人比細倈人較無天分，結果分人刻到濛線，當多教授連署／愛佢下台。共年个三月初仔，台北市公車LED顯示板，同啟聰學校个英文／翻到 Municipal School for the Deaf（市立聾仔學校），有人不滿投書報社，市政府交通局遽遽要求客運業者跈等改到 Taipei School for the Hearing Impaired（台北聽障學校）。

　　 任何一個強勢族群用語言抑行為欺負弱勢族群就係沙文主義，在文明个國家，公眾人物同大企業都非常注意自家个言行，驚怕分人講係沙文主義，帶分自家抑企業負面个形象。台灣个烏人牙膏最早个英文翻譯係Darkie（烏人仔），下後受著美國烏人團體个壓力，正改到現下个 Darlie（達裡）。歐美先進國家，政治人物同企業家都愛接受敏感訓練（sensitivity training），學習仰仔講話行事正毋會有沙文主義。

　　 聽講吳淡如小姐同謝震武先生主持幾下個電視節目，乜算係有頭有面个人。一個係名作家，一個係名律師，應該愛當即靈、當理性，毋過從「愛情Hotel」兩儕恁糟蹋客人个情形看起來，佢兩個有必要去接受敏感訓練。

　　 民視「愛情Hotel」个來賓講客人係「客人仔猴」發生過後會兩十年了，仰仔吳淡如小姐、謝震武律師、過民視/毋識為這件事情同客人公開會失理，正經愐毋解。