行讀二崙
【文、圖／徐佳妤／臺北市國小客語支援教師】
發音人：徐佳妤（南四縣腔）
二崙，無一般客莊个鬧熱，在恬靜个老街項，做得鼻著醲醲个莊下味緒。
騎上鐵馬來到二崙這座敬聖亭，外形係紅色六角形磚造塔，係清朝時代起个，因為長年地基無主固嗄變斜斜，有了蓋生趣个名仔：二崙比薩斜塔。為了保存這座敬聖亭，莊項千過人用矺輪个方式，同佢對菁仔園裡背遷徙到綠水伯公廟脣口，修整過後又重現敬聖亭進前个樣貌，表現出客家人團結合作，傳承「敬字惜紙」个精神。
除了綠水伯公，在二崙莊頭有十八座伯公壇，其中「樹神伯公」係兩百五十零年个土番檨樹，愛兩個大人牽等手，正做得揇等樹梗一圈。「開基伯公」係二崙開基先祖順等龍頸溪來到這開墾，在榕樹下供奉石頭伯公，下後另改建做廟。伙房內个公眾伯公就安到「開莊伯公」，相傳開莊伯公原旦就在這，因為在地人買地起屋，跌筊仔問伯公愛徙走無？無想著佢毋盼得走，變成人、神歇共下，屋主也開放分莊項人來唱喏，實在蓋特別！一個細細个村莊，做麼个安恁多伯公？𠊎想啊，𠊎等祖先對大陸原鄉過烏水溝來到屏東清苦開墾，毋管天災抑係堵著同別个族群相處，都希望有伯公庇佑，分大家都平安順序，伯公實在係𠊎等个好朋友。
二崙社區有全臺獨有个「金銀花迷宮」，白白个花有淡淡个清香，愛等花轉黃正好摘，毋使射農藥、毋使掖肥，蓋好種，將藥草產業順序帶入觀光；行到「廣泉宮」這跡仔，映在吾目珠仁个係一幅「二崙村廟會」壁畫，畫到生活活仔，圖裡肚有人扛神轎、弄獅仔、做將軍，像行入廟會，分𠊎感受著鑼鼓哐天 、鬧熱煎煎个氣氛。有一句話講：「一寸土地一寸金，千金難買故鄉情」，曾經係六堆最繁榮个政治經濟中心，在村民煞猛打造後，分二崙有了無共樣个生命力，正經分人盡感動！
1.主固：音zuˋ gu;牢固。
2.鑼鼓哐天：音loˇ guˋ kuang tienˊ；鑼鼓喧天。
