柯湖泥磚屋
【文、圖／薛常威／國立中央大學客家語文暨社會科學學系在職專班碩士】
發音人：薛常威（四縣腔）
新竹竹東柯湖社區，有三分之二个面積，因為劃做科學園區第三期，所以限建了三十年，顛倒續保留下來純樸个客家農村。
在柯湖个半崎，有一間八十零年个老泥磚屋，差毋多會歸間橫忒，無屋頂，斯伸幾面牆定。2015年柯湖社區居民摎老師傅共下搶救這間老屋，老人家拈轉來造泥磚个手藝，渡等後生个志工共下來完成，花忒三年个時間，這間用泥磚翻起个老屋正重新企起來。
2021「客庄地方創生移居計畫」入選个後生人曾灣妹，正大學畢業定，佢選這間「柯湖泥磚屋」開始佢个計畫。用隨等節氣變換菜色个客家創意料理農村宴，來推廣客家文化。食，算將係一般民眾生活當中最重要个事情，食麼个、樣般食，也係認識一個族群文化當好个方式。照等節氣，像春分、穀雨，每個月會舉辦一場「客家農村宴」，由師傅教學員準備創意料理。每個寒假、暑假在這泥磚屋也有舉辦「農村生活體驗營」，場場就爆滿。
毋過單淨每個月个「客家農村宴」一定毋罅，故所拜五到拜日，這位乜有賣咖啡，手工現做个甜點、下午茶，最有特色个就係「泥磚咖啡」。這位乜係一間「親子寵物咖啡廳」，閒時渡等自家畜个狗，來這客家鄉下啉咖啡，吹風，看風光，打鬥敘實在當享受。
