楊梅高山頂鄭屋見證楊梅開發歷史（下）
【文、圖／徐貴榮／國立中央大學客家語文暨社會科學學系兼任助理教授】
發音人：徐貴榮（四縣腔）
楊梅當地俗話講：「高山頂做戲──餓死人」，又講：「落个兩點雨，狗頷魠（狗鮕魠、狗頷仔）食就毋罅，哪有輪着人食？」可見高山頂這隻位所地勢高崗，無麽个會落雨。有時下片楊梅壢落雨，高山頂還一片藍天白雲，係講落着一息仔，哪有見着？大部分係無水个看天田，四房在這開發个困難，生活个艱苦，確實非常艱辛。又還愛同其他人在這相爭開墾，發生糾紛，也係無奈何个事情，後來發展到恁好，實在係經過無簡單个歷程。
四房在高山頂个屋，本來係茅屋，過起變到伙房瓦屋。到第五世鄭土金為着希望後代做得出現還較優秀个子孫，聽地理師个建議，徙到這下這隻較好个地理位所，先起後堂，到有錢咧過起前堂，經過十過兩十年，包尾到大正1（1912）年正正式完成，也就係今晡日有名个「楊梅高山頂雙堂屋」，到今也有百過年个歷史吔！（圖5）
圖5 凹壽式內堂正身，石腳做礎，丹墀為梯，古典樸實。（2014.07.29攝）
聽講鄭屋在起屋个時節，堵堵上樑完成，大家坐等在該食點心，好點點有一隻鳥仔飛來撞着大樑，跌下來消忒。大家一看着這壞彩頭个情景，嚇到面瀝青，講毋出話，婆太出來看着以後，講一句當有智慧个話：「恩俚鄭屋田地恁闊，鳥仔就飛毋過。」一下就同壞彩頭化做吉祥吔！
還有聽講，這間當有規模个雙堂屋，建地有甲零闊，林地300零坪，雙堂四橫屋，前堂有兩對翹峨。因為屋背無幾遠係楊梅壢，為着符合客家後背有龍偎凭，造小山、種樹仔;屋前有蓮花風水半月池，符合古人「後有山為枕，前有水為鏡」个建築哲學(圖6、7)。
圖6 建地甲零闊，屋背化胎廣闊。（2018.11.05攝）
圖7 屋前風水半月池（2009.10.29攝）
建築比例當靚，左右對稱，全屋用磚瓦疊成，係客家黑瓦白牆个傳統組合，樑柱結構，全部係手工楔榫，無用一枝鐵釘仔，係當少看着个老屋保存。典雅毋華麗，在古樸中顯出歲月个風華。一般認為這間屋係起到虎穴項，會出虎將。毋知有影也無影？後代子孫就較保守，除忒第六世鄭榜生識做過楊梅鎮長以外，鄭屋早期在政治方面並無興趣，顛倒在農經、醫學、建築、工程方面較有貢獻。毋過文史方面，乜有第五世玉雪公係詩人，第六代鄭煥生係文學作家。
鄭大模祖堂在月眉山下隘口寮，係二世祖仁潛葉婆太在第三世分家个時節，抽出原來祖堂正堂三間做宗祠，將屋前水田兩段過左右兩片山林个做祭祀公嘗。祖堂經過幾擺整修，最近一擺係民國83年11月開始興工起建，準備將各房服祀个阿公婆全部集揫到這鄭屋總祠堂，民國89年11月良時吉日完成登龕，共同祭祀祖先。（圖8）
圖8 鄭屋總祠堂（2021.11.21攝）
楊梅街路本來就有一條「大模路」，來紀念鄭大模開發楊梅个功勞。鄭屋祠堂个完成，高山頂這間雙堂屋，在108年5月桃園市政府又公告係市定古蹟。所在當近土牛溝，對於漢人在這搭仔个生活發展史上，有當重要个意義。由這可見，鄭屋人个煞猛、努力，見證楊梅个開發歷史。（全文完）
※本文的「着」，同教育部訂的「著」之意。
