你涿𠊎介花粉 𠊎吹你介官帽
【圖／廖千慧；文／何石松】
發音人：何石松（海陸腔）
你涿𠊎介花粉，𠊎吹你介官帽，本來係講𠊎生日時節，你挑挑作法，分天公落水，來涿𠊎面上介花粉；𠊎乜愛在你生日時節，起大風來吹你介官帽，好回敬你。這係一種神明鬥法，飯匙堵貓介意思。
深一步來講，就係講你仰般對𠊎，𠊎就仰般對你，𠊎毋會欺負你，但是乜毋分你欺負，一般人恁樣形，連神明也共樣，也有佢介真性情，這係一句神明人格化，神明人性化介一句諺語，使人摎神明之間，融為一體，像屋下人共樣，同時，也係對天象觀察介心得，主要目的係愛好好預防風災，有仰般準備，就有仰般成果。
聽講舊曆介二月十九，係觀音娘介生日，因為係生日，所以該晡日，觀音娘心情當好，特別梳妝打扮，搽兜胭脂水粉，噴兜千年玉露，果然係出水玉芙蓉，仙姿玉女身共樣，靈光一現在眼前，恁堵好，關公也在這恁好介天時，出來遶光景，突然看著恁靚介觀音娘，嗄動了凡心，想愛搣耍佢。
看佢口中念念有詞，一時之間，天烏地暗，雷公並拚滾，一陣喊頭大水，觀音娘行在路上，又無擎遮仔，又無坐車仔，走都走毋掣，面上介花粉，嗄分這陣水涿到像人目汁闌干共樣，實在無結煞。
等到觀音娘定了心神以後，正知原來係關公在該搣衰𠊎。心肝想，𠊎生日，你無意無思落大水，害𠊎恁無面子，等有時有日，你生日時節，𠊎乜愛你試食看𠊎分你介鏖糟齋，看係鹹抑係淡；看係燒抑係冷，正知𠊎介厲害。
果然，到了六月二十四，關聖帝君生日，關公坐等神轎，風神哎哎介在外背遶境時節，忽然之間，一陣掀瓦拆屋介狂風，戽天戽地，咻咻滾介緊吹等來，飛沙走石，目珠擘都擘毋開，吹到車翻樹斷，行路都搖搖蕩蕩，毋使講，關公介官帽，毋知分佢吹到哪位去咧，害著關公光頭落杓行等轉，正經係你摎𠊎做初一，𠊎就摎你做十五。
難怪頭擺老人家，見堵著二月十九觀音生時，係講該日落水，就講六月二十四，一定會起大風，成時還會風合水呢。比論講，2021年二月十九無落水，但是六月二十四照常起狂風，落大水；今2022年二月十九有落水，毋知六月二十四會起大風無？
其實，重點不在於落水起風，係在吾俚對逐年介水旱災害有驚心無？有準備無？大家都知，逐年春天，除非天旱，春水係當足介，所以，二月十九常常會落水；共樣，逐年六七月，係風搓季節，六月二十四起風介機會也儘大，正會講二月涿花粉，六月吹官帽，正經係對災害介預防摎關心，一種弦外之音文學性介表達，可以講係「知音說分知音聽，毋係知音莫與彈(談)」用心良苦啊！
共樣，講著觀音娘摎關公介故事，全無不尊敬介意思，倒轉還較親切可愛，因為這係文學性介觀音娘，傳說介關公，有無盡介想像空間。老實講，吾俚觀念中介觀音娘，實際有兩位，一位係來自印度介男神，下凡來到東土，化為女身介觀世音。一位係妙莊王介三妹仔妙善公主，香山修行得道，兩位都係為了救苦救難，愛人民脫離苦難介觀世音菩薩，有莊嚴法相，慈悲救人，影響滿天下，正經係「天上神仙算毋清，人間斯念觀世音」，這位係屬於第三種。
顧炎武在《菰中隨筆》識講過：「今天下祠宇香火之盛，佛莫過于觀音大士，神莫過于關公雲長。」這位係用忠義介關公，摎大慈大悲觀音娘「涿花粉，吹官帽」介故事，說明「神明牽鋸，有來有去」這因果關係介道理，千萬不可以有點仔「石上種竹──無正根(經)」，儘採撩弄人。一方面係講神佛之間介人性化，趣味化；一方面係從人事來觀天象，用天象來想人事，所望介就係風調雨順，國泰民安，達到人神摎大自然介和諧，正經像如泉過山，秋水樓台介清爽啊！
※本文的「介」為大眾通用的「的」，同教育部訂的「个」之意。
