盎蜂
【文、圖∕富岡 邱鴻春∕中央大學機械工程學系碩士】
發音人：邱鴻春（海陸腔）
有一日阿姆看著隔壁鄰舍个紅龍果有開細花苞咧，想著佢在陂塘䃗乜有種欸幾叢，恁久較無閒行過去，草怕生到塞塞咧，交代崖講，你下班有時間去摎草割淨來，拿兜粒肥過去委，打正會大隻。
下班轉來，堵好還有點仔時間，想著阿姆講个，就著等靴筒，帶支觀音鐮，騎等自行車仔，準備來割草續運動，行到該看著，阿姆哀！娘婆草像人恁高，還過有當多蝦公夾草，強強會暈忒，想講既然來咧，還係遽遽來割好咧，頭犁犁割無一下就汗流脈落，割怕有成半仔左右，好恬恬頭那頂，分兩隻蜂仔叼著，手撥還撥毋開，正用手指摎佢拈忒，將該順續歇睏一下，無一下嗄當痛！
當時總知遽遽拈忒，也無看著係麼个蜂仔，坐等緊想緊毋著，頭那頂緊來緊痛，還過回想起來，感覺手拈該時，試著有拗蠻仔大隻，敢會係盎蜂?天時仔慢慢暗下來，想講還係遽遽轉較贏，毋堵好在這位暈忒無人知，該就死無命咧。
轉到來摎阿爸阿姆講這經過，阿姆講，崖俚這無盎蜂，崖做菜園幾十年，吂識有看著。娘婆肚嫲列膣仔有盡多，照看應該係分嫲列膣仔叼著，痛一下就過，崖自家想想仔，還係毋管佢恁多，遽遽還係先膏藥仔較妥當，包尾正慢慢仔無恁痛。
過忒兩日又帶等鐮仔去，接等上擺割个位所，割仔兩三下，又分佢叼著，這擺係分佢叼著手，有看著斷真係盎蜂，當大隻盡得人驚，頭那臥起來，正知竇就在紅龍果該架下，黏時打激顫手軟腳犁，正慢慢仔輕輕仔，行到較遠來看真兜仔，看著盎蜂飛來飛去，該色正經有像老虎色，難怪華語安到「虎頭蜂」。
本來想等竇較大，正捉來浸酒，就無馬上捉忒，慢慢發現，看著佢兜工蜂分工當幼，有人專門啣泥作竇、有人掌門口、還有人摘花蜜轉來，各各非常煞猛全毋會使梟，無幾久个時間，竇嗄加三四倍大咧。（如下圖）
看著該竇緊大緊多蜂仔，實在盡得人驚，自家也無麼个裝備，若係自家捉，到時分佢叼著無結煞，一方面紅龍果也差多好摘咧，包尾正打電話請消防隊派人來捉，正結束這擺个盎蜂事件。
雖然這蜂竇分佢兜帶走，毋過，賺著个係，今年逐隻紅龍果全當靚，因為有盎蜂在這位，嫲列膣仔毋敢來叼。
想想崖俚人，若係做得像這盎蜂恁樣，安分守己認真做自家个事情，無人會來想空想榫，抑係鑿空鬥榫做壞事，社會一定會更加安定，人民百姓做得過著還較快樂个日仔。
1.盎 蜂：音 angˋ pungˋ；虎頭蜂。
2.委：音 ve+；播、撒。
3.娘婆：音 ngiong po；指芒草。植物名，僅海陸用，四縣為「菅草」。
4.嫲列膣仔：音 ma ladˋ zhiˋ er；果蠅。
5.鑿空鬥榫：音 cog kungˋ deuˇ sunˊ；將榫穴與榫頭湊合在一起，形容狼狽為奸的意思。
