龍德米庄
【文、圖∕薛常威∕國立中央大學客家語文暨社會科學學系在職專班碩士】
發音人：薛常威（四縣腔）
在桃園平鎮个「龍德米庄」，係由馮家兩姊老弟共下在9年前創立个，「龍、德」係由阿公摎父親个名來个，來懷念、感謝佢兜个恩情，摎關愛土地个精神。
馮家兩儕一開始用全程無毒个方法專心種稻，種出大受歡迎个「桃園3號」香米。接下前人留下來个田，老古人講有土地就做得生活，肯做就不驚枵肚屎。參加農委會个漂鳥計畫，改忒以前用農藥、化學肥个傳統耕種方式，種出香Q个無毒米，做成發粄、甜粄，各樣个米產品，希望分還較多个人做得食著台灣好米。
土地像爺哀共樣保護子孫，俚一定愛加倍愛護，故所用最自然个方式來耕種，善待土地、順應佢个本性。用自然農法耕種每一項作物，堅持毋洩化學農藥，毋用化學肥，同時維持週邊个生態，分人食得健康。
毋係單淨種米，龍德米庄也有種各項个香草鮮花，蝶豆花、檸檬香蜂草、接骨木、洛神花、仙草等等。因為多年無用化學肥摎農藥，慢慢仔這幾年，田間个生態越來越多，小朋友在體驗活動个時節，無定著還有可能發現可愛个花蛄仔、老虎哥、雞油龜。
為著滿足人客一站買足个需要，這幾年除忒開發水粄、菜頭粄、爆米𥺆等加工米食之外，也種植各樣香草、洛神、關刀豆、番瓜、味噌等植物，正經做到「從產地到餐桌」个理念。
產地體驗活動自插秧、割禾等各樣農事體驗來成長、學習，也希望將惜福惜物个態度推廣出去，無定時舉辦親子體驗活動，分小朋友感受著台灣豐沛个土地，認識傳統个農家生活，感受大自然个美好，也將珍惜食物，愛護土地个理念，傳分下一代。
龍德米庄乜有舉辦一日農夫个體驗活動，在北部各大農夫市集，乜有舉辦農產品販售活動，歡迎大家來尞。
