中央大學電子報

HAKKA+YOUNG：關鍵密碼—客家仰仔同Y世代相接？

【圖、文／賴維凱／國立中央大學客家語文暨社會科學學系助理教授】

　　 傳統个客家語言、文化，愛仰仔同後生个Y世代相接，崖認為有幾個關鍵密碼：C、I、E、I。

關鍵密碼C：接觸Contact

　　 「Hak！Hak！Hak！阿姆哀唷，會嚇著人！」這係講客廣播電臺新手相連系列節目之一【後生Hak到你】个臺呼，乜係崖同𠊎研究所个學生仔廖芳瀅(Yuki)共下主持个節目，還係崖第一擺同後生仔共下合作為後生世代開闢个新節目，到今1年零過去吔，這下係芳瀅同佢个2個學弟妹(邱祥祐、林以晴)共下主持吔。對老一輩个人來講，崖算係後生世代，毋過對崖來講，這下，毋管麼人，係有「透過緊同後生人接觸，了解後生人个想法，自然形成經驗傳承、世代交替个觀念。」客家語言同文化个傳承，就毋係問題。

關鍵密碼I：認同Identity

　　 「大家好！崖係周鈺凱，毋係豬肉凱哦！」這係崖等節目開張个第1個來賓，乜係國立中央大學客家語文研究所个準碩士，還係崖在大學部第一擺開「基礎客語」課个客家系學生仔，講啊一嘴溜掠个客話，毋過佢毋係客人；「崖等去調查臺三線客人開个雜貨店同原住民个關係，發現吔……。」邱兆乾係芳瀅个學長，佢用聽起來蓋像無麼个正板毋過散發自信个美濃腔，分享佢去田野調查个經過同發現，崖同芳瀅聽啊呆杓杓仔，到今還印象盡深。

　　 頂項淨崖等訪問吔20個研究所學生仔其中2儕个一細息內容，做麼个後生仔用客話講佢个研究生活同研究發現个時節，會恁餳人？除吔佢等「會講」客話以外，崖還在後生仔身項看著吔「認同」，因為佢等正在同客家相接。係Y世代對客家語言同文化漸漸仔產生「認同」時，就表示客家脫離老古，開始注入吔新水同新个生命，產生質變同創新，這係恁多年來同客家系學生仔接觸後深刻个體悟。

關鍵密碼E：體驗Experience

　　 仰仔分後生仔認同客家，就係對「做中學(客話)」，「體驗」客家文化開始，就係分Y世代親自感受著客家語言、文化之美，佢等正可以「返」客為主，帶領客家行向無限个未來。

　　 毋過愛分後生仔「認同」客家，毋係一踢就著个，崖等可以先對認同後生仔開始！這下大家使用面書(Facebook)都蓋方便，可以尋「帶著客語購物去」(Shopping in Hakka)，這係一群後生个上班族閒時落下組成个「非政府組織」(NGO)，對2017年年底起勢，在大臺北、桃竹苗等地區訪問、體驗各種「客語商店」(你用客話同頭家抑係員工講，佢等會用客話回你)，到這下已經累積59家認證商店，這係相當無簡單乜係非常值得支持个一件大事，係講串聯起全臺各地稍可會講客話个後生仔共下去做這件事會仰仔？相信過程同結果絕對會分人愐毋著！

關鍵密碼I：堅持Insist

　　 愛分後生仔「認同」客家既然毋係一踢就著，嘎愛分客家同Y世代相接乜毋係一步登天，崖用當時還係【後生Hak到你】節目來賓，這下係大二个主持人祥祐在節目裡背講个一句話同大家共下勉勵：「毋係看著希望正愛堅持，係愛堅持下去正看得著希望！」客家个希望既然在這群Y世代身項，嘎崖等就「堅持」搭並盡力量搭好這座燒暖又堅韌个橋樑，分佢等行到同客家相接个未來！

(華語版刊載於臺中市客家文化半年刊《聽・看臺中客》【第四期刊】https://lihi1.cc/yjuS2)

圖一：【後生Hak到你】節目開張第一個來賓—周鈺凱，講啊一嘴溜掠客話个學老人。

圖二：用客話分享自家个調查發現一等餳人—邱兆乾，同時考著中央大學博士班，通過高考三級考試客家事務行政類科。

圖三：透過「特殊選才」錄取國立中央大學客家系个節目來賓—邱祥祐，這下已經係節目主持人。