懷念「大埔腔客語之母」徐登志先生
【文、圖∕徐貴榮∕國立中央大學客家語文暨社會科學學系兼任助理教授】
發音人：徐貴榮（四縣腔）
好點點聽着徐登志先生過身个消息，實在著驚又琢愕，一時心情感着非常个哀傷毋盼得。徐先生喜客，對人謙和，做事煞猛，從來毋識聽佢怨嘆，為着客話个危機，幾十年來認真打拚，全心全力推廣大埔腔客話、傳承客家文化。
徐先生係東勢人，在三十零年前開始，除忒在東勢國小教書以外，先後成立「寮下文化工作室、臺中縣客家文化協會、寮下人劇團、大甲河之聲合唱團」這兜社團，收集山歌、往語、童謠，訪問老人家，總下採錄760份錄音紀錄。編輯大埔腔客語教材、出版大埔腔客語著作三十零本、「臺灣大埔音客語辭典」這兜。還長透分人邀請去電台、電視台訪問、主持，帶領團員去表演。又擔任客家委員會个委員、客語能力認證委員、基本詞彙（初級、中級暨中高級）編輯委員、入闈客語能力認證命題委員、全國語文競賽評判委員、教育部客語常用詞辭典編輯委員。得着「師鐸獎、客委會傑出貢獻獎」同其他當多大獎，一講着推廣「大埔腔客話」，第一個想着个就係徐先生。今（110）年臺中市長頒分佢「大埔腔客語之母」獎座，實在係當著位。
圖 編輯客語能力認證基本詞彙資料，徐登志委員（前中）同編輯委員（筆者在後排右2）合影（攝影地點、時間待查）
頭擺，東勢角同罩蘭（卓蘭）个客話同家鄉苗栗个客話無共樣，𠊎兜講佢兜「下港腔」，後來正知佢兜安到「大埔腔」同「饒平腔」，佢兜反倒轉來喊𠊎兜「上港腔」。大約係共姓个關係，𠊎喊佢「大姊」，佢也用大埔腔喊𠊎「老弟」，試着當親切。記得舊年（109）年下仔還同佢共下在教育部開「客語常用詞辭典六腔召集人」會議，無想着還無一年，一個疫情害人強強疏離，還吂同佢多加問候，就天人兩隔？
記得同徐先生初相識，係在二十零年前讀碩士班，想寫「客語文白讀研究」之時，經過教授紹介去拜訪佢。佢看𠊎前去，非常親切，詳細解說、指點，當晝還愛做東，請𠊎去東勢最有特色个餐廳享受美味，該種深情，𠊎久久就毋會毋記得。
過後在客委會「客語能力認證客語基本詞彙彙編、客語三次方言辭典編輯、客語能力認證基本詞彙逐年个修正」、教育部「臺灣客語分級教材編輯、常用詞辭典編輯」會議，當多機會都共下開會，也同佢學習大埔腔，佢也非常耐心个教𠊎。還過特別交代，毋好為着學別人个話嗄毋記得自家个母語。佢係大姊，也係阿姆樣仔啊！
個人个詞彙認知，也同徐先生个觀念當近，還記得舊年年底該擺，在教育部討論客語詞彙用字个時節，形容「一個人當瘦又長槓槓」，愛用麼个字？𠊎同徐先生都主張用「薑女麻」个「薑根薑根」，毋過有委員主張愛用「山羌仔」个「羌筋羌筋」。愛用「薑麻」个「薑根薑根」个理由同根據，係認為「薑麻」係客家庶民文化，客家人同薑麻个生活有十分密切个關係，長透講「咬薑食醋」，諺語又講「一日三片薑，毋使上藥坊」，東勢有「食毋落三斤薑，毋好嫁入大茅埔庄」个俗話，三義到大湖之間還有「薑麻園」个地名，苗栗到今還流傳等「薑麻好」个民間故事，總下就在該顯現「薑麻」同客家人个生活有當深个關係，在恩俚个話裡背從來毋識聽着「山羌仔」同客家人个生活蹤跡，仰會知「山羌仔」个「筋」呢？徐先生完全贊同，表示這隻詞彙應該係「薑麻」个「薑根薑根」，毋係「山羌仔」个「羌筋羌筋」。
話還在耳公脣捩轉，先生好點點嗄駕轉瑤池。厥个精神風範，定著會永久留存。願徐先生跈風騰雲，到西方無憂世界。俚會對厥个懷念，化做一股力量，繼續為客家文化打拚！
註：徐登志先生在110年11月25日（舊曆10月21）過身登仙，12月6日（舊曆11月初3）下晝兩點在東勢殯儀館告別還山。
※本文的「着」，同教育部訂的「著」之意。
