三百六十行 行行出狀元
【文／何石松】
發音人：何石松（海陸腔）
三百六十行，行行出狀元，係講三百六十行，不管做哪行，斯愛認真打拚做，都可能會有非常傑出介表現，像中著頭名狀元共樣，受著大家介尊敬。意思係表示，社會上職業無高低貴賤之別，不論做哪行，都有狀元。
比論講，頭擺歸生人教書，尊稱為至聖先師介孔子，藥王大帝介五穀爺，剃頭祖師呂洞賓，財神爺之祖趙公明，做生理發財介陶朱公；還有圍棋國手林海峰，鴻海介郭台銘，台積電介張忠謀；捽三遍，光三日介阿瘦皮鞋羅水木；臺灣麵包師傅吳寶春等，全部係各行業等特出介人物，比狀元還較有名，該仰般毋講行行出祖師，行行出國手，愛講行行出狀元呢？
首先，來看仰般安到三百六十行。三百六十行，最早安到三十六行。在清朝徐珂介《清稗類鈔》講：「三十六行者，係講各種介職業。詳細兜仔分，大概計算為三十六行，加倍，就變七十二行；十倍，就係三百六十行。三百六十行介稱呼，係在宋朝時節斯有咧。」
講著愛考著狀元，該係非常困難介，因為，該愛通過院試介考試，安到秀才，又愛通過鄉試，安到舉人，有舉人以後正可以參加會試，通過以後，就安到貢士，貢士，可以參加皇帝親自主持介殿試，考著介，安到進士，進士裡背打頭名介，正安到狀元，又安到頭名狀元，該係仰般榮幸風神。
自從有科舉考試以來，將近1300年，正有800零儕考著定定，所謂「十年寒窗無人問，一舉成名天下知」，正會「朝為田舍郎，夜登天子堂」，難怪狀元介地位恁高，這下，正經介狀元雖然像「過月雞卵――散了黃」共樣，但是，狀元這名詞，還係長扯用得著。
能考著狀元，非常困難，該正經係前世燒好香，阿公婆有庇佑，係仰般不得了介事情，正特別有狀元遊金街介風光。聽講頭擺有一個狀元遊街，堵著一個撿樵介毋閃佢，佢當閼，撿樵介講：「狀元？有麼介了不起？𠊎去讀書，𠊎乜考得著。」然後就當等大家面前，按照狀元畫介墨線，用斧頭當精準介破到兩析，狀元硬硬看到戇忒。
接等，又看著賣油郎賣油毋使秤仔，佢渟油時節，在葫蘆嘴頂，放一隻銅錢，斯看著該從大桶渟下來介油，像一條線樣，堵堵好從銅錢介方眼中通過，一段時間以後，拿去秤，堵堵好係愛買介數量，狀元看到嘴擘擘，心肝想，難怪佢兜毋閃。
旋風之間，一個餔娘人走等來，講該有麼介，𠊎雖然係一隻鄉下婦人家，但是，𠊎會篩米，可以摎一升穀，一升米，合做共下，篩到幾遍以後，可以分佢米中無粒穀，穀中無粒米。結果，看著介係穀摎米清清楚楚介分開，狀元摎大家都看到嘴杓杓。狀元突然當安腦介講：正經係「三百六十行，行行出狀元」啊！
※本文的「介」為大眾通用的「的」，同教育部訂的「个」之意。
