箕山緣
【文／羅肇錦∕國立中央大學客家語文暨社會科學學系榮譽教授】
發音人：羅肇錦（四縣腔）
崖，出世在銅鑼三座屋，對歲邊仔就搬到竹圍雙峰山下敨氣。日據時代个人看著雙峰山像日本富士山樣仔，故所銅鑼个國民學校就安到富士公學校，一直到國民政府來台，正改名銅鑼國民小學。
崖，一歲邊仔就歇在雙峰山下，雖然敨氣異清異鮮，毋過生來矮細羌筋个矮督膦，輒常分人笑「矮牯仙打屁會出煙」，害崖見擺打屁就翻轉頭看係毋係正經會出煙，看多擺仔正知係這兜人笑崖矮細毋會大。等到崖七歲入學讀書欸，還當驚生份，毋敢同人交陪，毋敢同生份人講話，用這下个話講就係「自閉症」个細孲仔。
既然出世就毋多敢同人講話，崖就同自家講，無就一儕人蹶山，一儕人拈揚尾仔，一儕人捉金龜仔、灌土狗仔、挖沙鑽仔、煎竹筍蟲……。背尾吾爸牽一隻羊女麻轉來畜，吩咐崖日日就愛去掌羊仔，嘎下開始崖就緊同羊仔講話，緊同貓仔狗仔共下搞共下尞。到初中較知人我了，正有一兩個好朋友，正較毋驚人笑，正較敢講話。
十八歲，崖師範畢業，分教育部派到雙峰山背个新隆國民學校教書，這隻學校當時全校有十二班，六百零個學生仔，崖因為會彈風琴，故所主任就喊我扌帣手運動會教體操、教土風舞、教音樂，過畢業典禮還愛負責教青青校樹萋萋庭草。新雞隆歸隻莊頭還算異多人，街項還有精米所、雜貨店、豬肉店、衫褲店、賣菜攤，過年過節還算吂鬧熱仔。毋過來上課个先生學生仔就盡冤枉，當多人來上課愛行一兩點鐘正來得到學校，雖然崖歇在雙峰山下，翻過山峎就到新雞籠，但係去學校毋係貶過峎就做得，係愛𫟧轉銅鑼，行石頭黃泥崎翹个山路正有辦法到學校。有兜學生仔在八燕坑、黃麻園、茄冬坑尾，這兜逐日天吂光就出門，難怪有兜學生屋下無閒嘎下，就自動放尞無愛來讀書。
崖在新雞籠教三年書就辭職去讀大學，一直到崖六十五歲，大學教職退休下來，崖又倒轉來新雞籠，種樹種菜，挖泥搞水，同狗仔貓仔雕仔蛇哥共伴。
經過五十年个變化，新隆國小个學生仔全校總共存無五十儕，當年崖教過个學生仔，也變六十零歲个白髮老人，有兜見面強強會愐毋起來。雖然新雞籠後生人全部搬出去求發展，一下留在新隆國小讀書个學生仔伸無十分之一。人少無關係，崖本來就好恬靜个個性，故所尋著學校背个大竹圍，看起來像一隻大畚箕，凴等个山窩起一間屋仔，歇在該，就像沉浸在世外桃源樣仔，崖特別將這個位所安一個名仔「箕山園」。
安名「箕山」，一方面講山形像畚箕，另方面學古人許由，囥在箕山無愛見人，該就恢復吾个本性「驚生份」，毋好同人交陪，毋敢同人講話。這也係老子道德經講个「雞犬之聲相聞，民至老死不相往來。」許由个想法就係老子个境界，也係吾个本性。
