雨
【文、圖∕徐佳妤∕臺北市客語支援教師】
發音人：徐佳妤（南四縣腔）
雨，帶分崖著驚、懊惱、暢樂同甜蜜……。
記得有一年寒假，歸屋下人去參加騎自行車个旅行，坐火車到台東池上，就落雨毛仔。食飽晝，大家正騎到「伯朗大道」，就出現一道𥍉爧，黏時跈等響雷公，無幾久，雨就落下來咧！緊落緊大，崖等交手亂串，共快拿出雨衫來著，毋過，還係涿到歸身潦潦，毋單止外衫溼溚溚仔，連衫服裡背乜汗流脈落。
因為雨當大，導遊只好請大家暫時停下來庰雨，崖等看等雨水對屋簷滴下來，滴滴溚溚落無停，「雨啊！拜託你停下來啦！毋好過落咧！」雨，像聽得識崖講个話，正講核，有影無恁大咧，大家又過騎上自行車。無想著，騎到半路仔，倈仔無注意地泥項有一隻水窟仔，毋堵好，赴毋掣急檔，人同車仔橫到路徑頭，跌到四腳惹天，挷胲大嫲聲喊：「屎胐蓋痛哦！蓋痛哦！」
跈在倈仔屎背尾个崖看著，心肝想: 「河壩跑馬」壞蹄咧！愛挷佢䟘，毋過佢跋毋起，該量時正經係「屎出褲帶又打結」，毋知愛仰結煞正好。該下自家顛倒怨怪落雨天，好在，旅行社有安排車仔載佢先到飯店歇睏。食夜過後去醫院檢查，雖然無仰仔，屎胐項嗄出現一大跡烏青，烏青有一日總會毋見核，毋過，頭一擺落大雨騎車仔橫倒，這得人驚个經驗，到今還在厥腦膈肚。
舊年暑假，同學生仔約好在學校練習朗讀，愛準備下課時，嗄拚大雨，雨緊落，蓋得人惱！一時半刻像毋會停，學生仔个爺哀去食頭路，淨厥婆一個人掌屋，佢無帶著遮仔，崖只好陪等佢行歸去，毋過細人仔像蓋好落雨，一路暢喋喋仔，同崖緊打嘴鼓，毋多知仔，就行到厥屋下樓底下，自家正放心。
毋知你有看過《等一個人咖啡》這影片無？細倈仔（張立昂飾）細妹仔（宋芸樺飾）在廊仔下堵著，因為落大雨，兩儕擎等一支遮仔……這量時，雨，毋好停下來啊。看著這一幕崖想著，記得有一暗晡去分人請，愛歸來時，外背落起雨毛仔，老公輕輕仔挽等吾个手，共下擎等一支遮仔，定定仔行過大路，這「雨」，係甜个，甜在吾心肝頭。
崖想……雨，乜會帶分你著驚、懊惱、暢樂同甜蜜。
共快：音kiung kuai；南四縣講法，指很快。
