關西關係實驗生活
【文、圖∕薛常威∕國立中央大學客家語文暨社會科學學系在職專班碩士】
發音人：薛常威（四縣腔）
兩個原本無熟識个細阿妹仔，在一擺市集共下擺攤个時節，正知原來兩儕共樣係關西人，懷等共樣个夢想，佢兜除忒成立「初心者市集」，2016年，兩儕還在關西个石店仔老街尋了一間80年个老屋，開了「關西關係實驗生活」。
因為兩儕係關西人，回轉故鄉希望摎社區共好，發展新个關係，希望用人摎人合作个概念，像隻實驗室共樣，開創未來還較多發展个可能。這下佢兜專心舉辦獨立唱客家歌个音樂會，希望現代音樂做得帶入關西這恬靜个客庄。乜有辦市集、講座、友善動物个活動。愛聽講座乜盡簡單，花150箍買一杯涼水就做得入場。
這下老屋空間有「壹號店」摎「二號店」共下經營，係一種平行時空个概念，兩家店共下在相同个地點出現，平日營業時間用「汪汪來我家」動物友善咖啡廳个方式經營，係有舉辦音樂會，或者其他活動个時節，「關西關係 」正會自另外一個時空出現。
毋多知，關西關係實驗生活已經辦過五年个音樂會，在恬靜个關西，無恁多觀眾个狀況下還做得經營下去，實在無簡單。故所在今年十二月舉辦「五週年音樂祭，邀請五年來識在這「實驗生活」空間表演過个音樂人轉外家，摎好朋友共下過一個溫暖个十二月。
大家去關西个時節，愛記得過去聽這當有特色个獨立音樂會。
