中壢第一街
【文、圖∕徐貴榮∕國立中央大學客家語文暨社會科學學系兼任助理教授】
發音人：徐貴榮（四縣腔）
中壢老街溪脣个中正路295巷，頭擺人喊「中壢第一街」。（圖1）
圖1 中壢中正路295巷，頭擺人喊「中壢第一街」入口（攝影時間約2010年）
這條巷仔這下係老街溪行廊个一截，狹狹仔零落零落，一滴就無打眼。除忒日日朝晨、臨暗仔，人散步行上行下，自行車騎上騎下，還有麼个呢？盡多僅可係去巷仔尾參觀「河川教育中心」，抑係尞日參加各單位在該中心辦个活動定定。除忒老一輩个人以外，麼人還會知得頭擺這條巷仔安到「中壢第一街」？（圖2）
圖2 中壢第一街零落个景象（1996年攝）
原來客人來中壢个開發，到清朝乾隆中期差毋多就異有規模吔！盡鬧熱个所在，就係在這「中壢第一街」順等老街溪，透到大時鐘、第一市場个大同路一搭仔。聽當地个老人家講，日本時代以前，老街溪个水量當大，做得通行舢舨船，一直透到大園。在這中壢第一街偎老街溪脣還有一隻碼頭，做得上下船貨，係早期中壢貨物个集散地。街脣兩片店仔連等一間又一間，礱間、米店、布店、金香、雜貨這兜民生必需品都在此結市。日日貨物出出入入，人聲唩唩喊喊，生理人賺着錢吔，還有上去頂背个「豬埔仔」消磨一下个，造成當多豬埔仔个傳奇故事，當時係仰般个鬧熱所在，故所人講「中壢第一街」。
當時个店門兩片，係用「乾1、乾2、…乾6」、「坤1、坤2、…坤6」个樹枋仔一扇一扇仔鬥个，到暗晡頭收市个時節，一扇一扇仔層起來，到第二朝晨開市，又正一扇一扇仔剝下來，目的就係用來防賊仔偷，恁樣个屋仔實在當特殊，中壢到民國八十零年還有留存。（圖3）
圖3 店門兩片用樹枋仔「乾、坤」編號，一扇一扇仔拴門窗个景致，中壢當時伸這一家，目前拆忒咧！（攝影時間：1997，地點：新街延平路）
相對於後來到道光年間正發展个「新街」，這搭仔就安到「老街」。老街從中壢第一街開始算起，巷仔口出來中正路到康樂路口中光行、番薯市場為止，安到「上街」；過下去到大時鐘、第一市場安到「下街」。上街同下街，頭擺正月半鬧元宵个時節，聽講上街同下街个人用燈謎揣令仔、詩令打詩句，互相比賽、笑謔、搣射對方；抑係七月二十義民中元慶讚，前一日放水燈个時節，看麼人做个水燈較靚、較有特色，增添節慶个歡喜氣氛又毋會傷着和氣。
巷仔口出來左斡中正路向北過河壩，向左斡義民路做得透埔心、楊梅，講係頭擺个縱貫路。直行就係人講頭擺平埔族「澗仔力社」个「舊社」仔，到這下，歸條街鬧熱煎煎，到新明市場前兵分兩路，一條去觀音，一條透新屋。在康莊路右斡向南做得去龍岡、大溪。下街順等大同路向東做得去桃園、大園，係當時个縱貫路。清朝同治10（1871）年設中壢為「宿站」，中壢就變到台北、桃園到大湖口、竹塹之間个重要驛站，經過个公務人員大約會歇宿一夜。到日本時代，大時鐘對面个華南銀行後背，係中壢街役場，也就係政府辦公个位所，附近仔也係當年去新屋、觀音輕便車个發車站，你講仰會毋鬧熱？
到這下，老街溪經過揜河壩起屋、拆屋整河壩、河脣做行廊，分人散步、騎自行車，所有个景致完全改變哩！過去河壩脣个吊腳屋、夜市仔、暗間仔、樹枋仔店門全看毋着咧！中壢第一街沒落，豬埔仔也沒落吔！至於頭擺个碼頭在哪仔？尋毋着蹤跡，老街溪个河壩水，還係悠悠悠悠流往大海，一去無回頭！
圖4 這下中壢第一街，左片巷口中正路，右片河川教育中心，柵欄係老街溪行廊步道。（2021.10.26攝）
※本文的「着」，同教育部訂的「著」之意。
