戇戇戇 豬肉烳米醬 精精精 豬肉無半斤
【文／何石松】
發音人：何石松（海陸腔）
戇戇戇，豬肉烳米醬；精精精，豬肉無半斤。意思係講朝晨出門做事，做到暗正轉夜，安分守己，老老實實，外表看起來戇戇介平凡夫妻，雖然生活簡單，只愛勤儉打拚，有為有守，還係可以過著豬肉烳米醬介幸福生活。豬肉烳米醬，係頭過當時行，當基本介一種菜，雖然簡單，也已好食，像韭菜煎卵共樣，係平凡，知足介代表。
也有一種遊遊冶冶，流流漂漂，有錢毋顧家，上繳場像行灶下，掉忒家庭子女上酒家，等到無錢時節，無屋可戴，戴人樵堆下，無飯好食在該汁缸下摸啊摸，毋單無屋可僑身，想食豬肉無半斤，目囁囁在該過著流浪介日仔，正知差咧，斯毋好笑人戇，精戇係平長啊。
幾十年前，在大隘該隻位所，有一個人，人人喊佢阿梅頭，本來還已好，自從去茶店食茶以後，嗄分該名安到阿美子介細妹仔迷著咧，正經係拋妻別子，屋也毋知好轉，錢也無轉屋。有一日，旋風走等轉，講愛將屋賣分厥餔娘，又愛摎佢割册，子女也無愛咧。從此以後，各分東西，自家斯去尋該隻阿美子，摎佢做烳戴，做番仔牛。無想著，有錢時節阿哥情，有錢時節酒壺重，等到錢包凹凹時節，該斯無錢時節酒壺空，無情阿妹詐耳聾，無幾久，斯分該細妹仔㧒忒咧，正經係「有錢契哥，無錢狗拖」啊！
有人看著佢，一身著著爛之爛擐，睡在人介店亭下，又有人講，看著佢在人介樵堆下，又有人看著佢摎人分，做乞食；又有人看著佢，睡在路邊滣，睡在廟巷，餔娘子女，全無愛佢咧！看著已衰過，做人講介，「餔娘捨米――係妻量(淒涼)」啊！毋單淨無屋好僑身，愛食豬肉，連半斤都無呢。毋當上屋介老阿伯，老老實實，「看人面，毋當看泥面」，矻斯做事，子女賢孝，逐日豬肉烳米醬，食到開眉笑眼。毋好小看豬肉烳米醬啊，還有米醬湯，摎七層塔，食了斯會尋味喔。
有老公花心，掉忒餔娘；也有餔娘難耐窮苦，無愛老公，另外去嫁有錢人介。漢朝朱買臣，四十零歲，還係苦到屙裡肚，屋下鑊嫲會唱歌。厥餔娘堵毋著，吵等講愛另外尋過老公。原來佢早就係一隻「雙黃雞卵――兩個心」啊。朱買臣講：「亻厓五十歲以後，就會大富大貴，你已辛苦，忍耐加一下，下一擺，亻厓會報答你介。」厥餔娘應講：「鬼正信你，像你這種人，㓾分豬仔食，豬仔也無愛食，無枵死路邊漘，該斯已該載，還想愛富貴？哼！」佢就另外摎有錢人結婚咧。
無想著，後來朱買臣，正經時來運轉，一路順風，官拜太守。上任路上，看著前妻摎厥老公在該整路，前妻知係買臣，就遽遽前來見佢，買臣也大人度量大，無計較前嫌，過去介事情，該斯「豆腐串錢――莫去提」啊！摎佢兩公婆載轉官府之中，用最好介待遇來招待，無想著，個零月以後，厥前妻就自殺咧。毋係無屋好僑身，豬肉無半斤定定，連命也無忒。
難怪人會講：戇戇戇，豬肉烳米醬；精精精，豬肉無半斤。人愛知足，正會常足。
※本文的「介」為大眾通用的「的」，同教育部訂的「个」之意。
