台台語同台客語
【文／羅肇錦∕國立中央大學客家語文暨社會科學學系榮譽教授】
發音人：羅肇錦（四縣腔）
台台語本來一般稱呼「閩南話」，客人就講佢係「學老話」。也就係早期帶來臺灣个漳州話同泉州話个混合體，俗名漳泉濫。漳泉濫在台灣陸陸續續有河洛話、閩南話、學佬話、鹤佬話、福建話、福佬話、台灣話、台語、台台語。
台台語係台灣台語个簡稱，係文化部近期提出來个新名詞。文化部將目前台灣語言全部加一個台灣，安到台灣台語、台灣客語、台灣原住民語、台灣華語、台灣新住民語。簡單講就變台台語、台客語、台原語、台華語、台新語。這種安名个方式，內行人一看就知，全部加台灣表示「獨」个立場， 用台語代表學老話係表示「霸」个做法，故所「台台語」係又獨又霸个名稱。崖無知文化部做麼个愛恁樣搣，無成挑事愛製造族群對立？
大家就知「白馬非馬」係戰國時代當有名个論辯理論。厥意思係講你嘍「馬」仔來，結果烏馬白馬赤馬…全部會走兼來， 但係你嘍「白馬」來，結果就單淨白馬會行兼來定定，故所馬≠白馬，安到白馬非馬。共樣道理， 你喊講「台語」个人過來，結果講學老話、講客話、講原住民話、講……全部講台灣語言个人就會行兼來，但係你喊講「學老話」个人過來，結果就單淨學老人會行兼來定定，故所學老話≠台語，這也係證明學老話毋係台語。
下背拿台台語同台客語，來看長期以來个對立同糾結。
先講對立。漢朝个百越，中國東南海邊有歐越、閩越、南越，當時个閩越就係閩語人个祖先，歇在今晡日个福建一帶，南越就係客語人个祖先，歇在今晡日嶺南一帶。日據時代認為福建來个學老人講个話就安到福建話，廣東來个客人講个話就安到廣東話。這兜「閩越／南越」、「福建話/廣東話」係對立存在也係對立稱呼。
但係「貉獠」、「河洛」、「學老」就糾結難分咧，「貉獠」早期係講嶺南一帶个人，係瑤畲客人个祖先，後期係福州莆田泉州搬來个人同化當地个瑤族人，大家背尾又稱呼佢潮州人。「河洛」係貉獠个借音，在台灣稱呼漳州泉州潮州來个人全部係河洛人。「學老」也係貉獠个借音，在廣東大家稱潮州人學老，在台灣客人稱呼漳州泉州來个人全部係學老人。可見「貉獠」、「河洛」、「學老」係糾結難分个稱呼。
一直到客家人發起「還我母語」運動，台灣開始重視本土語言，河洛話閩南話个稱呼就開始變化，大家就以台灣為中心，愛脫離中國、愛同福建分開。就開始用hoh lo拼音，用鶴佬、用台語來做閩南語个代用稱呼。到漯尾其他个河洛、福佬、鶴佬、學老全部無愛用，硬留「台語」「台灣話」來代表漳泉濫，尤其獨派个人強力霸佔「台語」這隻詞，認定閩南話就安到台語。
