方圓書房
【文、圖∕薛常威∕國立中央大學客家語文暨社會科學學系在職專班碩士】
發音人：薛常威（四縣腔）
「方圓書房」自2014年開始，恬恬囥在楊梅埔心四維社區个巷肚，用後生个頭家張羽芳摎佘益源兩公婆个名，各拈一隻字「芳」、「源」，諧音「方」「圓」，故所安名「方圓書房」，也希望方圓百里好看書个人共下來這位讀書。希望因為這間書店，提高社區民眾看書个習慣，書店在地方个文化，有當重要个地位。
會有開書店个想法係因為頭家娘當好看書，囥當多書。「這位無書店，該就來開一間好了。」楊梅係傳統个客庄，在埔心四維社區有當多个外省人，雖然店主人毋曉得講客話，佢還係在這開了一間書店，想愛分書店變成社區个據點，讀書个好所在。開間理想性當高个獨立書店無恁簡單，一開始三隻月，根本無麼个人客，試過當多方法，正知最有效个宣傳方法就係好个品質，口耳相傳，分還較多人知這間書店。
書店係賣二手書為主，店面無當闊，書櫥係頭家自家做个，書盡多係細人看个童書摎繪本。店內有提供飲料摎甜點，分人客做得輕鬆自然个在店肚坐等讀書。書店乜有舉辦分社區个大人摎細子參加个讀書會。
開書店一開始係自一隻理想開始个，但是現實摎理想一定會有增差，會堵著困難摎失敗。毋過因為做个係自家最有興趣个事情，堵著困難乜會全心全意來想辦法解決，定定个慢慢向前行。
