中壢新街城牆遺跡
【文、圖∕徐貴榮∕國立中央大學客家語文暨社會科學學系兼任助理教授】
發音人：徐貴榮（四縣腔）
漢人在清朝初年，從大園順等老街溪來中壢開發，到乾隆30 (1765) 年，差毋多就異有規模吔！地名也從康熙年間，「康熙臺灣輿圖」（大約康熙31～43年，西元1692～1704年个臺灣情景）裡背个「澗仔力社」，到乾隆25（1760）年「臺灣民番界址圖」改到「澗仔壢」來看，「壢」字个特徵使用，表示漢人同化忒原住民，中壢到該央時，係客家人來開發个所在。相對於後來「新街」个發展，這搭仔就安到「老街」。
老街个發展到一定个程度，就開始慢慢仔往東片兩公里左右个「新街」發展。新街原本無街市，堵好到道光6（1826）年，台北、新竹連續發生閩粵械鬥，客家人耐毋何學老人，陣陣失敗，緊徙到客家人較多个中壢來，無就新竹關西抑係苗栗去。道光8（1828）年，在總理謝國賢這兜个規劃之下，漸漸仔有街路店面，同這兜避難个人徙到街路去，新街也差毋多在這下形成一隻新个街市吔！
仁海宮（新街廟）也在道光年間創立，奉祀觀音菩薩安慰人心。道光12（1832）年，街庄總理彭阿輝建議在新市街四片析起城牆、挖城溝，保護人民百姓。起起來个新街城牆無幾闊，毋過係當時桃園个三大城牆之一，設有四隻城門。明治40（1907）年出个「台灣堡圖」還有記載新街城牆个遺址。東門在聖蹟亭前，北門在元化路同延平路交會个北片，南門在仁海宮前、新街溪脣，西門在元化路同延平路交會个南片。（圖1）
圖1 引自民105（2016）年出版，吳藍功主編个《風華再現 仁海宮》仁海宮190周年紀念特刊第5頁，張國興教授畫个「中壢市新街城堡」圖。
道光17（1837）年，街庄總理傅盛乾推動配合開墾農田，發展農業，促進經濟產業發展政策，實施獎勵方式同新起店面齊整為理由，招募老街生理人搬到新街，獎勵生產禾鐮仔，使得新街變到全臺灣最有名个禾鐮仔生產所在，加上老街个番豆酥、樹桶（木桶），變成中壢三寶，新街一時變到鬧熱起來，毋會輸老街。
新街城牆原來有兩環，東片一直到原來个六合高工頭前，北片到這下个監理站。這土牆一直到昭和10年（1935）大地動過後還在，毋過就無人記得麽个年代拆忒吔，有人講大約係大東亞戰爭个時節。這下仁海宮後花園還看得着頭擺城牆个土墩遺跡，還過新街國小頭前圍牆邊揜起來个護城溝。（圖2）
圖2 新街國小圍牆脣，停車格下背个護城溝遺跡，遠位係仁海宮後。
（攝影年代待查）
到這下，還看得到个遺跡還有元化路个北門伯公（圖3）、延平路聖蹟亭前个東門伯公定定（圖4）。企到仁海宮廣場前个忠義橋頂，看着仁海宮个信眾行入行出；新街河壩水悠悠悠悠向東流去，一下就無停留。新街溪整治過後，人講「深潭」个「南門潭」（圖5）無咧！回想頭擺人在該泅水、洗衫个鬧熱情景在哪仔呀？
圖3 元化路271巷口个北門伯公、天公爐還刻有「北門」。（2021.09.24攝）
圖4 新街國小校門左片、延平路脣个東門伯公，幾年前改建到這下个樣式，門楣頂還有「東門福德祠」字樣，左片後背係昭和7（1932）年重起个聖蹟亭。（2021.09.24攝）
圖5 還吂整治前，溪街溪南門潭（深潭）个位所（2001攝）
※本文的「着」，同教育部訂的「著」之意。
