欺大莫欺細 欺細無面勢
【文／何石松】
發音人：何石松（海陸腔）
記得細人仔時節，爺哀常常會講，毋好恁綻，恁撩雕，更毋好濫糝撩大撩細。尤其毋好看別人較細，就去撩人，無定倒轉會分人堵到嘴擘擘，也毋敢化。所謂欺大莫欺細，欺細無面勢，該正經就長籮䈪有好㧡，當無面子啊！
欺大莫欺細，係一句句中互文，意思係講，毋好欺負比吾俚大介，更毋好欺負比吾俚細介，不管大人細子，老嫩後生，全部都做毋得用言語去誚㸐人，去頂碓人。就係毋好儘裁講話介意思。大人對大人，雖然有成時係講笑，但係，講話係講到昶直，就恁樣得罪人都毋知。
聽講宋朝宰相寇準，在鬧熱介桌席之間，毋堵好摎自家介長鬍鬚，搵著油油介菜湯。官員丁謂看著，斯走過來，愛摎佢捽淨，無想著好心著雷打，嗄換來一句難聽介話：「你係國家大臣，斯會摎亻厓捽鬍鬚係無？」正經係：良言一句三冬暖，惡語傷人六月寒。從此以後，丁謂就懷恨在心，日日在皇帝面前燒佢介壞話，又聯絡王欽若，曹利用等大臣，成立一隻攻擊網，炮火連天，使著皇帝也信訂訂，認為寇準毋會講話，是非多，就摎佢降職，貶官，殷摎佢流放，一直打落到雷州過身。
對大介毋好有欺心之言，對較細介乜共樣。聽講斯十二歲介甘羅，就能夠替厥姐公丞相解決皇帝出介難題，毋過，皇帝當疑狐，係毋係厥姐公介能力，正經有恁慶，就暗中派人去打探，正知丞相屋下，有一隻當聰明介甘羅。皇帝就下聖旨，喊佢兩子阿公上殿面試。
兩儕來到朝廷，行到宮門口，斯停下來。皇帝看著，就捉隻烏蠅，講：「你揣揣看，亻厓手上介烏蠅，係生介？抑係死介?」甘羅就一腳足兼過門檻，應講：「你看亻厓這下，愛落去？抑係愛出來？」皇帝分佢堵著面紅紅，嗄無話好講。
該兜大臣驚怕皇帝愛分甘羅做大官，斯聯絡起來糟搣佢。有人提議講，韶早大家上山看日出，最先看著日出介，正有飯好食，因為甘羅矮，佢兜較高，所以毋愁自家看毋著日出。麼人想著，大家都向東片看介時節，甘羅自家向西片介高山頂看，結果，甘羅係第一個看著日出介，該兜大臣全部嘴杓杓，枵等轉，正經係欺細無面勢。
聽講孔融十歲該年，跈厥爸去洛陽，愛拜訪該下當有名介校尉李元禮，掌門介毋分佢落去，佢就講：「亻厓摎尊府有親戚關係。」等到落去廳下見著李元禮，元禮斯問：「你摎亻厓係麼介親戚？」孔融斯講；「頭擺亻厓介祖先仲尼，摎若介祖先伯陽，有師生關係，所以吾俚世世代代斯有當親介關係！」在座介貴賓人客，無人毋安腦介。太中大夫陳韙較慢來，聽著就講：「細時恁狡猾，到大無見奇。」孔融斯應講：「想你在細時，必然當狡猾。」害陳韙嗄企坐毋核。
「粉骨碎身全不怕，愛留清白在人間」這首詩仔，係民族英雄于謙，在佢正十二歲時節，斯寫出來介。佢細細時節，當聰明，又當煞猛讀書，記才儘好，看過就毋會毋記得。聽講佢八歲該下，有一日，著等紅衫，騎等馬仔去遊尞。無胚著，該鄰舍著白衫介阿伯，看著生趣，就笑佢講：「紅孩兒，騎烏馬遊街」，于謙登時就堵佢講：「赤帝子，斬白蛇當道」，害鄰舍嗄無結無煞。
又有一擺，于謙梳等雙髻去讀書，一隻和尚仔看著，試著已古琢，斯頂碓佢講：「牛頭仰般生龍角？」于謙聽著，無幾歡喜，黏皮應佢講：「狗嘴哪識出象牙？」該和尚仔嗄嘴擘擘，講毋出話來。
欺大欺細，有時有日，堵彩遇著還較厲害介人，該毋係「啞仔讀書―難出聲」，就係「火炙鼻空―面都紅」，當無面勢啊！
※本文的「介」為大眾通用的「的」，同教育部訂的「个」之意
