著驚
【文、圖∕徐佳妤∕臺北市客語支援教師】
發音人：徐佳妤（南四縣腔）
你識堵過著驚个事情無？在吾身項發生兩件得人驚个事情，雖然經過恁多年咧，毋過，該畫面還清清楚楚在腦膈肚。
記得五歲時，有一日朝晨，阿姆講：「阿妹啊，崖去市場一下仔，黏時就歸來，你在屋下愛乖乖哦。」阿姆出門無幾久，就有人搉門：「有人在屋下無？崖愛入來抄水表。」雖然心肚蓋疑狐，還係戇霸戇霸 開門，該男仔人一入屋無講一句話，就行去間房，在簞笥 肚緊操緊揙，崖目盯盯仔看佢在搣麼个。
「阿叔，你毋係愛抄水表？」佢無搭崖，這下換崖緊張咧，心肚希望阿姆搶快歸來，吾心躁躁行去陽臺，低頭看往下，總算看著阿姆買菜歸來咧，崖暢到大嫲聲喊：「阿姆，有一個阿叔在屋下抄水表呢！」吾姆一聽著遽遽上樓，該阿叔聽著崖講个話，就開門瀉一路出。下後，阿姆愛去哪仔，就算一下半下都會渡等崖。
另外一件著驚个事，係崖小學一年生，下課時節去便所屙尿，該量時，便所个門係用門閂仔 ，屙核後，門嗄打毋開，崖大力緊拍門，挷胲喊：「外背有人做得同崖打開無？」同學用「嘴」教崖仰仔開門，毋知係緊張抑門閂仔壞核，本本共樣「鬼打覡公—無法」 無幾久，傳來「噹、噹、噹」上課鐘聲，大家就瀉走咧。
「哎喲！愛仰仔正好！」屎出褲帶又打結 ，想噭又噭毋出，淨想著：係先生發現崖無在教室，毋知會畀責罰無？緊愐緊驚，自家毋知哪來个勇氣，高不將就對門頂高跳下來。分一個還在便所个同學看著，佢嘴擘擘仔問：「你係仰仔跳个？」自家驚到一句話乜講毋出，毋知仰仔應佢。
到這下，係崖一個人在屋下，有人撳電鈴，開門會特別注意；出外去便所，會看門鎖有壞核無？正經係「分蛇哥咬一口，看著稈索就走」啊！
1.戇霸戇霸：音ngong ba ngong ba；傻傻的。
2.簞笥：音tan sii；外來語，櫥櫃。
3.搶快：音qiong kuai；趕快。
4.門閂仔：音munˇ sonˊ eˋ ；栓門的橫木。
5.鬼打覡公—無法：音guiˋ daˋ sang gungˊ —moˇ fabˋ； 鬼敢打覡公，表覡公法術不靈光，喻沒辦法。
6.屎出褲帶又打結：音siiˋ cudˋ fu dai iu daˋ giadˋ；便急，褲帶又解不開，喻事情緊急又沒法解決。
