揞嘴个日仔
【文、圖∕彭賢祥∕桃園市客語薪傳師】
發音人：彭賢祥（四縣腔）
舊年个寒天
大陸个武漢 出現一種怪病毒 當會遰人
尤其會破壞 人敨氣个肺部 盡得人驚～
無幾久
就遰到全世界 滿哪仔就係
全世界个交流 續斷忒了 機場停塞塞个飛行機
港口停當多船仔 城市封城 世界變生份
大家就緊張 開始注意衛生 輒輒洗手 消毒
戴嘴揞仔哩～
舊年个熱天
臺灣醫學防疫好 當少人遰著
揚名世界 相爭來學習
共下食飯打嘴鼓 捷運巴士來上班
校車自送來讀書 快樂生活無煩惱～
毋過～
嘴揞仔還係戴核核 盡久無看著 熟事个面容仔
見面也無相借問 親戚朋友變生份人
唉！仰會變到恁樣呢？
今年个寒天
落雨聲毋見忒了 老屋脣个坑壢 泉水強強會燥忒
莊下人相爭放水 竹筍李仔少出
水庫溓忒生草排 從北到南燥絲絲
日看新聞夜來愁 限水生活盡艱苦
毋單淨恁樣～
水庫無水電毋來 各行各業愛水電
輪流停電亻厓毋愛 省水省電共下來
今年个熱天
揞嘴个日仔 當毋久～
機場飯店遰病毒 萬華社區來傳染
三級封城傳滿天 路項無人日難過
市場愛去人恁多 食飯娛樂在屋肚
手機電腦搞歸日 為著生命無法度
1
今年个秋天
煞猛个政府～
驚人病毒來防守 醫護人員盡辛苦
民間政府來扌帣手 注射疫苗正係寶
大家个希望～
天公落雨盡歡喜 有水有電無愁慮
病毒走忒毋揞嘴 正常生活像神仙
2
