自動他動个構詞方式
【文／羅肇錦∕國立中央大學客家語文暨社會科學學系榮譽教授】
發音人：羅肇錦（四縣腔）
中國南方个苗瑤侗傣系統个語言，大部分還保留異多動詞、形容詞做得分「自動」同「他動」兩種意義个詞。也就係講自動同他動个分別，係這兜語言當重要个構詞方式。比將講瑤族話一般「死」講tai22，「V死」講dai42（藻敏），無就一般「死」講tai42，「V死」講tai24（標敏），也有一般「死」講tai22，「V死」講tai44（金門）。這位講个一般个死係講自家慢慢自然死忒安到「自動」，「V死」表示分別種東西加害正死忒該就安到「他動」。瑤語自動他動个分別係用清音濁音（t：d）來分別，無就用變調（42→24／22→44）來分別。客話同苗瑤共一系統轉化過來，故所也有真多自動他動轉換過來个詞彙，大家用久了嗄無知係自動他動个關係。像壞（faiˋ）人同壞（fai ）忒，壞人係自動，壞忒係他動。壞人係自家本身壞，壞忒係外力將佢搣壞，故所讀上聲調faiˋ係自動（壞心、壞筍、好壞），讀去聲調fai 係他動（坐壞、敲壞、壞蹄）。
客話自動他動个構詞方式，大部分係用聲調改變來處理自動他動，像sung （「送錢」去聲）係自動：sungˋ（「扌送門」上聲）係他動。hienˋ（「顯靈」上聲）係自動：hien （「看顯顯」去聲）係他動。ciimˇ（「沉下去」陽平）係自動：ciim （「捉來沉水」去聲）係他動。gam （「監督」去聲）係自動：gamˊ（「監人食酒」陰平）係他動。damˊ（「探頭」陰平）係自動：tam （「探橋」去聲）係他動。gong （「降下來」去聲）係自動：hongˇ（「投降」上聲）係他動。
除忒用聲調改變表明自動他動个差別以外，也有聲調韻母共下改變个他動，像tug （「中毒」陽入調）係自動：teu （「毒魚仔」去聲）係他動。zo（「做家、做賊」去聲）係自動：zogˋ（「作家、創作」陰入調）係他動。siugˋ（「瓜熟蒂落、熟水閹雞」陰入調）係自動：sug （「煮熟、熟識」陽入調）係他動。log （「落雨、落價」陽入調）係自動：lau （「褲落落、落下颔」去聲調）係他動。弓：giungˊ（「天弓、弓爛」陰平調）係自動：giungˋ（「弓起來、弓弓」上聲調）係他動。
最特別个係像客話个「上」「下」「斷」「空」這兜詞，逐个都有三隻聲調（陰平、上聲、去聲）。陰平、去聲係自動个文白讀，上聲个係他動，下背照順序來講：
上：songˊ陰平自動（上桌、上街）口語，song 去聲自動（上課、上期）文讀，songˋ上聲他動（上土、上樑）。
下：haˊ 陰平自動（下來、下手）口語， ha 去聲自動（下課、下期）文讀，haˋ上聲他動（下貨、下帽仔）。
斷：tonˊ陰平自動（斷截、斷線）口語， don 去聲自動（判斷、斷案）文讀，donˋ上聲他動（斷水、斷奶）。
空：kungˊ陰平自動（窿空、空手）口語，kung 去聲自動（空跡、空地）文讀，kungˋ上聲他動（空忒、空淨來）。
從「上」「下」「斷」「空」个聲調變化來看，這兜字个本調係陰平，背尾借入官話音就讀去聲（因爭官話讀去聲），另一個本來他動个詞就採用新个上聲調，恁樣正有辦法同表示自動个陰平調做一個分別，分到兩隻聲調，恁樣正有辦法表示自動同他動个分別。
