處處引燈處處溫情（下）──懷念古國順教授
【文、圖／鍾榮富／南臺科技大學應用英語系講座教授】
發音人：鍾榮富（四縣腔）
古老師為人謙虛，親和力強，同時佢盡有眼光，心胸大，眼界闊，視野深，勇於提拔後生人，無籓籬之見。愛交代工作前，總係細心細意。五六年前，佢開始帶𠊎入全國語文競賽客語組个召集工作，分年將職務慢慢交接分𠊎。古老師先話𠊎編輯「朗讀文稿」，還䟓䟓對台北下來南台協助，帶了兩三儕各腔頭个前輩，正實分𠊎感覺「蓬蓽生輝」个榮幸。這份工作𠊎做了兩年，大概佢還算滿意，半句話都無加講，就恁仔𠊎開始擔任客語組个召集人。最初幾年，會前𠊎都會打電話請教，佢淨淨鼓勵定定，無麻个多講，盡量讓𠊎發揮。2017年以後，佢完全毋再搭競賽个事，連評審工作也辭忒。還好在，客語界个先進大老，都還帶等一份情，看哪在古老師个面子上，每年都不辭辛勞來添手，故所能夠年年順利進行。
在古老師心中最深个角落，可能還放毋下个願望，就係愛做好培養客語教師同編好客語教材，推廣客話，普及客家意識。早在2010年，古老師有一個機會在國教院課程中心辦客語課程設計个活動，佢邀請𠊎去演講，指定講題就係「課程設計个同心圓架構」。該下𠊎就開始發夢，建構一種理想，愛教好客話定著愛用生活語言為基礎，編排採用同心圓个架構，將客家各腔頭个共同語詞、短句、句型為核心，一層一層向外發展，重點係每一个例子都愛用完整个句子來表達。這个理想，其實係理論性質，完全無想著會有實行个可能。到𠊎最後一擺見到古老師个宴會中，佢還念念不忘這个𠊎兩儕个夢。
無想著，後來政府愛編寫十二年課綱，在因緣際會下𠊎分人請去做客語組召集人，𠊎就將這個理念帶入課綱之中。更加無想著个，係教育部在秀琪教授个強力建議下，著手重新編修客語教材，𠊎同幾儕客籍个國小教師談論這種編書理想，得著熱烈支持。到這下，第一冊已經編好，現場試教个先生反應非常熱烈，都認為教生活客話正會鮮趣。在這个秋風肅颯个時節，懷想古老師，心中浮起來个影像，就係佢个堅持，親像眼看著佢一隻巨大而孤高个身影，在大樹下迎面吹大風，吹亂了佢个頭毛，吹毋去佢个客家硬頸精神。
古老師晚年罕得來南部，最後一擺可能係2015年佢得著客委會「終身貢獻獎」該時，來六堆文化園區受獎，現場人客盡多，都爭等愛同得獎个人攀談。雖然𠊎一路上同佢紹介南部客家風情，食飯還共桌，還係無辦法深談。後來幾擺見面，都在開會場所，𠊎歇南部，來台北開會通常愛顧車班，行程匆忙。當時心想總還有見面个機會，做得請教、做得講話，如今古老師身入仙界，正想起宴殊「一向光年有限身，等閒離別易銷魂」个詞，再想辭酒宴，只能望天了。
