大哥種番檨
【文／黃美貞／光復國小教師】
發音人：黃美貞（四縣腔）
退休係當多人个夢想，吂退休該下，日日就想愛退休放尞，等著退休又試著閒亍亍仔，無結無煞。從來就毋好耕山耕田个大哥，無想著退休嗄起勢種番檨，有空跡就楔欸一頭落去，毋多知仔就種有成十頭仔，無閒這兜果仔，就變成厥个生活裡肚，盡重要个一部分。
大哥輒常講，從細到大就毋好讀書，毋過做一个現代耕種人，佢時時上網去了解農業个常識，比將講，結子像番豆恁大粒个時節，就愛刪減兜仔，一穗留一果，恁仰養分有足，打出來个番檨正會大粒；番檨生到像雞卵恁大，就愛用絡仔絡起來，蟲仔蜂仔較毋會來拑，皮正會亮，又省使洩農藥，一來安心二來省本；在樹頂高，蒂頭多少仔黃个番蒜，就好摘下來，做得先放著米楻，無就同芎蕉共下翕加幾日仔，畀轉色變軟。佢認真說明个表情，就像一个準備考試个學生仔，連農校卒業个二哥，乜說到壁竳！
熱天个時節，食冰過个番檨，係盡暢快个一件事情，又香又甜个味緒，無論生食也係焙乾，就受著大家个歡迎。根據記載，臺灣盡早个番檨係荷蘭人傳入來个，該種青皮細粒个土番檨，在路脣項輒常看著，味道香但係肉薄薄仔，毋驚蟲害又耐命乜係厥个特色；後來在1950年代，又從美國引進愛文、海頓、凱特這兜洋番檨个品種，這時節，做得講係臺灣大量栽培番檨个起頭。
臺灣个農民對番檨个改良，當有自家个想法，黃金煌先生在自家个果園培育出來，淰黃又大粒个番檨，看起來同木瓜相像，食起來當甜又無絲，「金煌番檨」个名仔就係恁仰來个，係第一個民間研發出來个番檨品種，毋單淨得著神農獎，還外銷到香港、新加坡，係目前產量第二多个。
最近當紅个新品種「夏雪」，係農改場研究員李雪如研究出來个，有土番檨醹醹个香氣，果肉幼甜度合高，前前後後花忒十四年个時間正成功，係番檨界个名牌貨。故所大哥擇無共樣个來種，逐頭樹仔結果个時節，前前後後，毋會囤著，味緒變化多，歸隻熱天就有番檨好食，實在有罅幸福。
在臺北東門捷運站个永康街，番檨冰一等出名，淰淰个番檨放在刷冰面頂高，還有兩球番檨軟冰層等上，單淨看就當打眼，當多觀光客䟓䟓從外國來臺灣，指定愛食這個點心，一盤冰个價數當過兩隻便當較加。有一站仔，番檨冰店一間續等一間開，排列个人龍看毋著尾，連日本東京就有開分店，雖然講番檨係外來種，毋過在臺灣變成特產，算來乜係臺灣个寶貝。
手機仔傳來一條訊息，通知𠊎做得去利便商店領包裹，原來係大哥个番檨收成了，特別寄一箱請𠊎嘗看那，大細粒都有，無像水果店个恁靚恁勻，毋過味緒特別餳人，還添加一味，就係阿哥痛惜老妹个人情味。
