「老雞嫲較好踏」，“the old hen fear less the rooster, the old are easier to consult with.” （老母鷄比較不怕公鷄，年長者比較好商量）英文無將客話「踏」个意思翻出來，（「踏」係公个雞、鴨、鵝打嫲个），毋過有同這句話个意思點出來。雞公愛打雞嫲該下，遠遠就會逐等來，雞僆仔看啊著嚇到瀉等走，老雞嫲會跍下來恬恬仔分雞公踏，英文正會恁仔翻。
「日大千斤，夜大八百」，“every day adds a thousand, every night eight hundred catties.” （每日加一千斤，每晚加八百斤）無論係客話、英文、抑華語都真難瞭解係講麼个。其實，這句話係將買來个豬子放入豬欄該下講个吉祥話。原在已多人畜豬仔來補貼屋下个所費，總望豬仔做得順順序序畜大來賣，正會有這句往語。
「黃蚻愛人富，蝲䗁愛人窮」，“the cockroach likes the rich, the spider likes the poor.”（蟑螂喜歡富人，蜘蛛喜歡窮人）有錢人食著無愁，屋下肚項項有，黃蚻就跈等好空，哪就有好食，故所愛跈好額人。苦个人屋下項項無，哪就生蟲仔，蝲䗁一哪仔做得牽絲網蟲仔來食，故所愛跈窮苦人。
「窮人無麼个好，三餐早」，“The poor man’s cooking is quickly over.”（窮人的烹飪很快就結束）。窮苦人苦煎煎仔，食毋成食，著毋成著，有東西好飽肚就好偷暢誒，哪會去講究愛仰仔煮，兩下半就舞出一餐飯，故所除忒三餐早早仔食以外，無麼个好贏人。
「麼个都做過，不過蚊核毋識閹」，“he has done everything essential to do; expert.”（他做盡了所有的事；行家）英文淨翻前半句，後半句用一隻英文字點出歸句仔个意思，毋過就無客話恁生趣。一儕人麼个都會做，就吂識閹過蚊仔个核卵，正經係愛佢來閹，應該佢也會做正著。問題係蚊仔無核卵，愛佢仰仔閹呢？這句話係用來沙人確實係專家，逐項事就會做。
「畫眉打輸屎缸鳥」，“the thrush beaten by the magpie robin; men who with little opportunity accomplished more than who have.”（畫眉鳥打輸鵲雊。意指機會小的人，其成就反而贏過那些擁有良好機遇的人）無論係外形抑叫聲，畫眉仔顯明贏過屎缸鳥，毋過相打會輸屎缸鳥。意思係講一儕人个出生背景、生活條件、機會都當好，因爭自家毋自重，毋增志，尾項成就顛倒輸分背景、條件、機會都毋當佢个人。
「賴佛偷食醢」，“to involve a vegetarian in stealing shrimps in order to eat them! Impossible!” （賴吃素的人偷拿蝦子來吃！不可能！）這句話係講佛祖係食齋个，醢係葷个，賴佢偷食，仰會有可能？《客英大辭典》个「醢」解析係“a preparation of small shrimps, etc. salted and pounded with a little water and eaten raw with strong condiments.”（細魚仔，蝦公等个製品，用一息仔个水同鹽鹽生過，同味緒重个配料共下生食。）𠊎識寫過幾下篇有關醢个論文過散文，這下還藏有幾下罐兩三十年个石貼醢過山豬醢。在東勢、大湖這兜所在還有人做。
