瓦特咖啡water&coffee
【文、圖∕薛常威∕國立中央大學客家語文暨社會科學學系在職專班碩士】
發音人：薛常威（四縣腔）
會知「瓦特咖啡」這間店，係這擺疫情嚴重，醫院个醫生護士防疫盡辛苦無閒，店主人余俊德斯摎自家做个咖啡送分醫院个人，大家來相惜鼓舞，共下來面對疫情。
余先生本來係賣早點个，因為本身當好啉咖啡，故所買當多泡咖啡个器材，乜得過各項烘豆師比賽个大獎，做過泡咖啡比賽个評審。一開始咖啡店開在中壢，雖然這幾年臺灣人啉咖啡个興頭緊來緊大，毋過咖啡店乜越開越多，競爭乜變大。故所在2019年，佢摎店仔搬到埔心四維社區个巷仔，重新開業。有人講埔心這位人無啉咖啡个文化摎習慣，余先生講文化係做得慢慢仔培養个。
瓦特咖啡除忒提供世界各地好品質个咖啡摎臺灣本土優質个茶，乜有賣在地農民个農產品。分勞碌个現代人有一隻恬靜个所在，啉一杯當香个咖啡，歇睏一下。
余先生長透義務去教附近个學校餐飲科个學生仔仰般形烘咖啡豆，仰般形泡咖啡。還過佢乜試著，因為開咖啡店係本錢較少，係較簡單个事情，故所盡多後生人，選擇開咖啡店來創業。毋過因為對市場大環境毋罅了解，又無做出自家个特色，一兩年無賺錢，店仔嗄橫忒，當打爽。對後生人个信心有當大个打擊，有兜人還愛背債好多年。余先生用自家个經驗摎專業輔導後生人創業，開咖啡店，恁樣形正毋斯行恁多个冤枉路。
其實疫情影響之下，瓦特咖啡个生理乜無恁好，毋過店主人還係用自家最好个咖啡，來安慰辛苦防疫个醫護人員，正經做到關懷社區，摎社區居民來共好。
