平鎮湯屋
【文、圖∕徐貴榮∕國立中央大學客家語文暨社會科學學系兼任助理教授】
發音人：徐貴榮（四縣腔）
從平鎮區中庸路一段262巷行落去，差毋多有300零公尺遠个湯屋（圖1），係臺灣乙未抗日戰爭「安平鎮之役」分人毋記得个一個家族。
圖1 位在平鎮區鎮興里新光路四段360巷69弄138號个湯屋公廳中山堂，座東向西，做得遠看埔心台地，本來係泥磚屋，民國77年拆忒照原樣重新起過。（2021.08.15攝）
湯屋先祖15世伊炳、16世大鵬兩公識在清朝乾隆年間，先後從原鄉廣東省嘉應州鎮平（蕉嶺）縣高思鄉過海來台，毋過後來又轉去。大約到嘉慶年間，大鵬公大个倈仔17世楊栢公正渡等餔娘邱婆太正經過臺灣。楊栢公在淡水上陸，先到蘆竹新庄仔開墾，降兩個倈仔鶴麟、鳳麟。鶴麟公討李氏降四個倈仔，鳳麟公討詹氏降三個倈仔，總下七大房。
道光年間，學老、客人逆着，發生閩粵械鬥，蘆竹地區个客人奈毋何，一個個仔徙走。鶴麟公帶等家族徙到平鎮公廳這搭仔，種茶絡食幾下十年，到經濟較好兜仔正起公廳，服祀阿公婆，屋脣種一層又一層密密个竻竹防盜防賊。鳳麟公帶等厥家族搬到中壢魚市場一搭仔，贌耕過日。
湯屋到平鎮雖然有較慢，毋過當出丁又出人才。鶴麟公傳下个四房，有16個孫仔。鶴麟公四個倈仔，長子源清、滿子明清係貢生，二子和清、三子煥清係監生，全係讀書人。長子源清第三個倈仔20世新順公，號「如樹」，係「漢書先生」，號比名較通行，人淨知厥「號」毋知厥「名」。光緒16（1890）年，同胡、黃、王恁多姓氏人家共下出錢集資起鎮安宮，新順公第二個倈仔21世鼎祐在日本時代昭和年間做過平鎮庄長。
光緒21（1895）年6月下旬，日本佔臺打到平鎮來，人喊「胡老錦」个胡嘉猷、同黃屋黃娘盛帶頭，武裝勢力開第一銃，開始桃竹苗客家人乙未抗日戰爭。湯屋同胡屋兩鄰舍隔無幾遠，聽講湯屋公廳左片人家脣項該口陂塘壁下，就係胡屋大伙房食用井个遺跡（圖2）。
圖2 聽講樹下左片就係胡屋分日本人炸壞个古井遺跡所在（2021.08.15攝）
當時，湯屋提供物資分胡老錦扌帣手打日本，同老人細子、婦人家散到遠位宗親該去。戰爭結束，胡屋分日本人燒淨淨，湯屋好得無受着傷害。這場安平鎮戰爭，劈鐮奈毋何長銃，鉛珠抵毋過砲彈，胡老錦統領个抗日義軍失敗，死忒當多人，胡老錦、黃娘盛這兜繼續退到龍潭、關西過打，包尾失敗毋見忒咧！聽講胡老錦轉長山去。事情恬靜過後，黃娘盛改名「黃念初」偷走轉來，背尾還做過安平鎮庄長。
聽人講：湯屋側角有一戶人家識在整田个時節，發現田底下有燒到烏烏个火炭同磚節，過挖下去看着鋪到平平个鵝卵石，當有可能係當年胡老錦伙房屋面前个禾埕。二房和清公个後代23世永進先生（圖3）講：「這條巷仔兩片个田地，差毋多係湯屋人个，在厥公將茶園開到變田个時節，識在地泥下挖着當多人骨頭，也異有可能係當年死難个義軍骨骸，總下拈拈揪裝到幾下罐金斗盎，做一門風水，葬到南勢塚埔項，湯屋人清明年年去掛紙。一直到平鎮市公所公墓公園化，興建納骨塔，將塚埔个風水納入骨塔過後，統一由政府祭祀，正無去掛紙。
圖3 湯永進先生接受筆者訪問，談論族譜世系、墾殖，還過當年傳下个抗日歷史。（2021.08.15攝）
平鎮市公所識在這條巷仔同另外一條巷仔相合个位所，起一座紀念亭，毋過長年失修壞忒吔！前幾年，統一促進黨經過地主个同意，起一座新个「忠義亭」，圖寫當年史蹟分人了解，也順續分人經過好尞涼，脣項立一垤石碑，寫等「胡嘉猷乙未抗日紀念碑」，毋過落款个年代毋係「民國」，係「孔子紀元二五六六年九月九日」（圖4）。
圖4 胡嘉猷乙未抗日紀念碑、忠義亭（2021.08.15攝）
到這下，平鎮胡屋傳下个四房人，開枝散葉，當多人到外地發展，也當多人賣忒祖公傳下个土地分外地人，田地荒忒草惹惹，好好个田無人耕。永進先生講：「看着當毋盼得！毋過生到這下个時代，道嘆又乜無奈何！」
※此處的「着」為大眾通用的「到」或「著」，同教育部訂的「著」之意。
