六月初 虎嫂食虎哥 六月六 伯勞嫲食哀肉
【文／何石松、圖／羅德桂】
發音人：何石松（海陸腔）
六月初，虎嫂食虎哥；六月六，伯勞嫲食哀肉。係講逐年小暑前後介六月初，斯係虎哥虎嫂介新婚佳期，也係兩儕融為一體介日仔，在鬧熱滾滾介洞房花燭夜，兩儕好到毋知人事介時節，新娘公半夜都無胚著，自家嗄變做花月良宵新娘介點心。所以講：六月初，虎嫂食虎哥。共樣介，在該等熱介三伏天六月六前後，聽講伯勞嫲子肚屎當枵，等到鳥嫲討食轉來介時節，伯勞嫲就摎厥姆食忒，所以講：六月六，伯勞嫲食哀肉。
這兩種動物，一種係在夫妻恩愛軟如棉介時節，旋風之間就分心愛介新娘食忒，正經會分人心寒膽顫；一種係在爺哀恩惠大於天，吂有回報無相干，還摎哀仔食忒，係講發生在人身上，正經係「芋荷纏頸──會扡胲」，好得，該係禽獸動物啊！原來，這句諺語介意思，就係講人摎動物介差別，斯該一屑屑仔人性定定。同時，也愛有影正好講喔。
其實，人也係動物介一種，所差別介，斯點點仔定，該就係仁義道德介人性。吾俚對盡多動物，全表現了仁心愛意，比論講對老虎哥介印象，並毋會毋好。還認為佢係益蟲呢，尤其欣賞佢面前兩枝手，像刀仔像鐮仔又像鋸仔，一伸出來，還係大英雄呢！又可以挨粄挨礱，所以摎老虎哥安做挨礱丕波。
記得客家童謠講：「挨礱丕波，打粄唱歌，打著三斤米粄無幾多，兜凳人客坐，坐著濃雞糕，哎唷！毋好罵亻厓恁孤盲，祝你轉去步步登高，狀元及第，五子來登科。」這係一首鬧熱介童謠，但是，無想著，華語安到螳螂介挨礱丕波，後背有恁沉毒介心肝，係仰般想也想毋著。佢毋單淨食老公，食厥哥，食厥姊，食老弟，食老妹，食親戚朋友，無佢毋食介，等親介人都食咧，該蛤蟆蛙仔還斯講，千萬毋好話著佢雙手合十像修女樣，一下發威，你就走無空囥喔。難怪佢又安到「刀螂」，專門「擎刀殺情郎」，虎嫂食虎哥，係千百年來介大殺手啊。
在芒種之日，挨礱丕波出世，五日以後，伯勞嫲就開始上臺唱歌咧。伯勞嫲係一種當惡介鳥仔，佢一下唱歌，係摎你講，你愛細義啊，係無你就會無命，果然，佢一叫，所有介鳥仔輟恬，反舌無聲，所有介蛇，跔做一團，毋敢停動，可見伯勞嫲介威風。其實，佢介叫聲當難聽，當得人惱，所以人講，「伯勞嫲，厥厥厥；有嘴講別人，無嘴講自家」，尤其佢觜著蛙仔，蟲蛇，蛤蟆等，無一下食忒，還摎佢吊在樹頂，久咧變肉乾，當畏人，大家總試著，伯勞嫲係最惡毒介鳥仔，幾千年來，代代相傳，講伯勞嫲食哀肉，實在係冤枉佢咧。
伯勞嫲毋單淨無食哀肉，還係在生冤枉死介呢。聽講春秋時代，周宣王時，有一個人，安到伯奇，厥姆過身咧，厥爸係有名介大臣，安到尹吉甫，又討一個後哀轉來，接等降一個老弟，從此以後，厥爸就聽著當多關於伯奇介壞話，害伯奇嗄分爺哀逼到江邊投江自盡。厥老弟非常傷心，斯寫一首詩仔懷念阿哥，厥爸看著，也當艱苦，感覺自家毋著咧。
有一日，佢坐車仔去城外尞。看著一隻鳥仔在蠶仔樹頂，對佢發出噭眵介聲音，突然試著，這當像自家介徠仔變做鳥仔轉來。就問：「你係伯奇無？分你愁勞恁久啊！係，你就飛亻厓車頂來。」鳥仔果然跈佢轉去，在屋外大叫。尹吉甫喊厥餔娘拿箭來，表面愛射鳥仔，結果一箭射死伯奇介後哀來謝罪，從此以後，就將這種鳥仔安到伯勞。
原來伯勞嫲恁孤棲，佢介叫係無奈何介，逐年從夏至叫到冬至，叫講在生冤枉死，死後又分人冤枉食哀肉，正經係「古井燒香──暗出煙(冤)」啊，幾千年來，人都恁樣講，仰般「貓抓粢粑──毋得㪐爪」呢！
看來，六月初，虎嫂有影食虎哥；六月六，伯勞嫲無影食哀肉啊。
※此處的「介」為大眾通用的「的」，同教育部訂的「个」之意。
