拗竹筍看人生
【文、圖∕彭賢祥∕桃園市客語薪傳師】
發音人：彭賢祥（四縣腔）
年正過啊忒！續下來就愛掛紙，滿哪仔就係紙炮仔聲。跈等大家就愛無閒了！因為屋脣个竹園肚，開始就會鬧熱煎煎，連恬靜个莊下嗄變到無共樣，車仔排長長像河壩水，莊下出現講國語个後生仔，大嫲聲在該唩唩喊喊，佢兜毋係在該冤家，係因為煮竹筍个機器忒大聲聽毋著，就像菜市場樣仔恁鬧熱。
看著桂竹筍就想起頭擺，跈等阿爸帶亻厓去拗竹筍个情形，臨天光仔就分人喊䟘起來，目珠就還吂擘開來，就換衫褲、著水靴筒、戴帽仔、戴手落仔、背等家濟仔，腳一踏到竹園肚，看著滿坪塞塞，烏䁯烏䁯个竹筍，全部到腳膝頭恁高，當堵好拗，心肝肚想，今晡日會悿死哩！話吂講忒，阿爸講：「竹筍恁多愛拗較遽兜唷！｣阿爸用手指公撳尾節對摺，左手搬等頭節，右手跈等就摎竹殼項拉出一條溝仔，續等兩隻手指公順等溝仔摎竹殼綻下來，阿爸个手腳當遽，一條條緊拂到家濟仔肚項，續等阿爸又緊行緊剝，無幾久就歸家濟仔淰淰哩。
拗竹筍係當生趣又好搞个頭路，竹園肚个生態異好，有跏跏糾糾个蛇哥，看著就愛遽遽瀉走！還有當會挖空仔个鰱鯉，竹園肚个窿全部係佢个竇，毋止恁樣，還有會食竹筍个筍蛄仔，圓身像熟熟个柿仔色當靚，現下當少看得著哩！逐擺去拗竹筍个時節，會看著伸竹殼定定，嗄無看著竹筍个現象，亻厓煞煞行兼來看清楚來，心肝肚緊愐，算來係麼个食忒竹筍呢？啊！一目聶目，耳公聽到後背有嗶嗶噼噼个聲音，斡頭一看，嗄看著一隻烏疏疏个影仔，目聶啊過無看真，毋過識聽阿爸講：「竹園肚，長透有山豬來食竹筍。｣這應該就係，山豬肚屎枵該下搣个。還有在耳公脣，飛來飛去緊噭，搭毋著又盡得人惱个蚊仔，有成時仔，會停在手梗項，肚屎食到紅紅飽飠畐飠畐仔，亻厓用手巴掌大力搭下去，毋過手梗兩下半起胮當癢，緊爪緊講：｢這隻該死个蚊仔！｣
老古人言：｢竹愛嫩時拗，子愛幼時教。｣竹筍愛嫩嫩時節拗，在拗竹筍該央時，看著竹筍在石縫項必出來，竹筍圓身係扁扁个，乜有竹尾𠖄等竹笐，竹筍圓身係彎彎个，用竹筍來看恩个人生，人在細个時節，愛用心好好仔教，在正常个環境下成長，毋好等大該央時，正來拗直，正來撚畀圓來，到該央時就來毋掣哩！就像桂竹筍共樣，愛摎石頭搬走，竹笐擎開，恁樣个環境下，正會生出又直又圓个竹筍。
