買菜哦
【文、圖∕左春香】
發音人：左春香（南四縣腔）
亻厓係傳統市場个好用者，頭擺恁仔，三兩日去一輪，人同人面對面交關，有厥燒暖个感覺。這下疫情傷重，亻厓乜係共樣，增加愛戴等嘴落仔，過仔一擺愛買到歸大載兩三禮拜个貨色。
這朝晨係買菜補貨个日仔。本成按算同上擺共樣打早就騎「引擎」去，趕一路項風涼沁沁仔，市場肚人乜毋會恁尖，菜乜過萋頭。
毋過亻厓又愐加一下，該兜按算愛買个幾下隻擔仔，像包仔老弟愛七點正會到，路脣賣菜个阿哥無定著个時間。再講，這擺愛去「××聯」買特效除黴个漂白水，最早乜愛八點正有開。故所決定赴七點該包仔攤，時間差毋多仔正去買漂白水，再過去同「引擎」加油。恁仔一轉下山个路，買這買該，時間正算得和。
結果啊，路脣菜車阿哥今晡朝晨斯蓋早來，亻厓到該下，菜色已經伸無一半。亻厓遽啊搶買該兜合貨个豆腐、豆干、豆乳，過仔蕒仔同菜瓜，還自家準備塑膠袋仔。佢怕想亻厓恁煞恁好交關又環保，看亻厓愛買該兜過「媸」个吊菜仔，就乾脆送分亻厓，講毋使算亻厓个錢。亻厓感覺著壞勢，又過同佢買一盎滷个冬瓜。
去到市場，苦瓜哥來了，苦瓜共樣賣3條五十，亻厓乜來3條。這到个山椒仔雖然毋靚，亻厓乜照買，因為這品種皮蓋薄，又脆又香，蓋承牙蓋好食，煠煠啊攞一息豆油，蓋簡單料理，同亻厓以前食過个山椒仔品種全無共樣。亻厓把握時間，又過同該兜面皺皺仔、講客話个老人家，煞手買買啊，番薯葉、皇宮菜、瓜藤菜等等，一下半手，買到險險擐毋贏。
來去買菜喔！買菜在亻厓防疫生活期間本本有盡多人情味。口ㄤ你呢？
1.媸：音beˋ；醜。
2.口ㄤ：音ang；那麼……。
