走音嗄變走義
【文／羅肇錦∕國立中央大學客家語文暨社會科學學系榮譽教授】
發音人：羅肇錦（四縣腔）
一個語言裡肚，對有音無字个詞，愛寫出漢字嘎下，盡簡單个方式就係借音。借音當下，盡方便个係用自家試著最相近个字音借過來用。借來用嘎下，因爭講來無正抑係聽來無準，結果講走音會聽走音，恁仔个影響下，寫出來个漢字就變忒盡多，當然意義也跈等漢字變到阿里不達。就像cidˋienˇcabˋ各地人講法就無共樣，有兜人走音「七層塔」，就恅著學老人个地較肥，故所比客人多兩層安到「九層塔」◦有兜人走音「自園插」，就自家屋邊園項隨便種種啊哩就有好摘。有人走音「七錢插」，就恅著像錢七（川七）樣仔當賤仰仔插就會生。其他還有「七園插」、「七緣塔」、「七層插」、「七緣插」一大堆，全部係走音走義个結果。還有客話本來講simˊ piu（新婦）保存原來个畲語發音，意思就係新討來个餔娘，背尾走音到simˊ kiuˊ，結果各地採用个字就無共樣，意思也變到奇奇怪怪。有人寫「薪臼」，係講婦人家去撿柴舂米當操勞个意思，有人寫「心舅」，係講婦人家心嚮阿舅屋家，有兜人寫「心臼」，這除忒借音以外，講毋出係麼个阿里不達个意思。
故所，一個有音無字个詞，愛仰仔去鬥厥个聲韻調，毋好走音，正毋會走義，這係無恁該个事情。像面前講个「心臼」、「七層塔」兩隻走音走義个詞係尋無字硬挳出來用个。實際講，日常生活還當多客話本身就有字有音，又乜會因為走音嗄連意思也變忒。像「狗貼耳」變「狗點米」，「木耳」變「木米」，「丈人老」變「長明老」，還有人為著生趣，挑挑走音，像講「十九世个人」安到「食狗屎个人」，講「二十世个人」安到「認食屎个人」◦
除忒客話本身有音無字會走音走義以外，客話來到臺灣以後，正借學老話來用个走音走義又乜哪就淨係。像因爭學老話有鼻公音（鼻化音～），堵好客話無恁樣个音，結果就將學老个鼻公音攉忒，走音到無鼻公音个韻，像「焿粉、焿粽」个「焿」，學老讀gi～客話就變giˊ，漢字就用俥傌炮「俥」；無就像「qi～肉」「qi～魚」个「生」「青」，學老讀qi～，客話借過來變qiˊ，漢字就尋一隻「萋」字來代用，意思變到草仔生來當菁。還有學老話个諺語「講一個影，生一個囝」客話無gia`～个音，就走音到用「頸」（giang）來代用，諺語變到「講一個影， 生一個頸」，客話个意思就變到阿里不達，無解無通。
國民政府來臺，推行徹底个國語教育，使著淨會講客這一輩个人，學講出來个客家國語，走音當普遍，無注意聽會走義，變到笑也毋係噭也毋出該種讀法。像「講國語」聽起來變「講狗語」，「熱死人」發到「樂死人」，變成很快樂的樣子，「各種知識」聽起來變「各種姿勢」，「姿勢」同頭腦个「知識」無共樣，「護花會」聽起來變到「復發費」共音，像這兜話音聽起來雖然差毋多，無麼个相關，但係意思就變到天仔隔五里恁遠，無定會跌失人就還毋知。還有像學老人講國語-ii全部走音到-u，故所挑事用「偶數白出」來笑自家「我是白癡」，「吃麵」講「粗麵」，「子孫」變「祖孫」，「老師」變「老蘇」。這種走音產生个走義現象，學老比客話還較多還較普遍，這也係今晡日學老話推廣漢字書寫个大問題。
總講愛學好自家个語言，轉換漢字嘎下，絕對愛詳細來思考分析，讀著本音毋好走音，用著漢字正毋會走義。
