「讓」來个蘿蔔乾
【文/黃美貞/光復國小教師】
發音人:黃美貞(四縣腔)
逐擺轉妹家,阿哥總會準備歸桌仔豐沛个好料仔,來招待嫁到臺北个老妹,盡生趣个係每一品菜就有自家个故事。
記得有一品菜係「蘿蔔乾煸豬肉」,這係從細食到大个便當菜,蘿蔔乾鹹鹹脆脆盡扯飯,三層肉油油香香盡合味,讀書个時節,阿姆日日打早䟘床煮食,堅持愛準備當晝个飯篼仔菜,故所朝晨个食飯桌會有兩盤桌心同兩盤青菜,細人仔愛自家做飯包,食一碗飯正做得去學校。該時个蘿蔔乾係阿姆自家種个蘿蔔仔做个,愛用鹽鹵、日頭晒、裝罐還愛等佢自然發起來,到轉色轉甘,愛無閒十過日正做得好,好食个話又還愛等到過忒年!
今暗晡个蘿蔔乾又係對哪來个呢?阿哥笑等講:「這斯係佢去同人讓來个。」𠊎試著當狐疑,心肝肚想,應該係買來个,哪有恁好空用讓个。阿哥又講:「在莊下同人家買東西,愛講讓毋係買。」因為當多東西,比將講:雞鴨、青菜本旦就係自家畜个無就種个,早就按算仰仔用,雞鴨愛敬神,青菜愛做菜乾過菜荒,一旦就無打算愛賣,乜毋盼得賣。假使你想買,愛用誠意來感動人,毋係出高價,有錢會打死人个心態就妄想買著,比將講:「這群鴨仔畜來真好,還得人惜哦!𠊎當久無食著土鴨仔,毋知做得讓一隻分𠊎無?」主人家旦勢會講:「𠊎對細鴨子開始畜,食糠仔蕒仔大个,還愛帶去河壩搞水,哪盼得賣人?」恁仰个對話可能像使鋸仔,來來去去愛幾下擺,等著主人家頷頭講好。
話講這桌頂餳人食个蘿蔔乾,係阿哥駛拖車去山項做事,駛過一座伙房屋,看著禾埕晒當多蘿蔔乾,佢遽遽停車,走去問在該無閒洎杈个阿婆,佢講:「阿伯姆,若个蘿蔔乾恁靚,做得讓一息分𠊎無?這兜蘿蔔乾像吾姆頭擺做个,𠊎去市場尋當久就毋尋著呢!」阿婆講:「這係愛留來過忒年,五月節包粽仔用个。」阿哥遽遽拿一張五百銀个紙票,指等路脣个拖車講:「分𠊎拜託那,還愛去走加幾下轉車仔,多多少少讓一息分𠊎好無?」結果,阿婆無奈何就扡歸十扡仔到油紙絡仔,唸唸唸唸:「毋好再來咧!𠊎自家就會毋罅用哩!」
這盤蘿蔔乾煸豬肉,毋單淨大家食到舐嘴舐鼻,連故事就聽到當感動!斷真,讓來个蘿蔔乾毋單淨有人情味,食欸還會尋味哦!