大湖同臺灣个畜蠶業
【文、圖／彭欽清／國立政治大學退休教授】
發音人：彭欽清（四縣腔）
在臺灣，講著大湖，大體人就會想著草莓。實際上，大湖對臺灣影響盡大个係畜蠶業。
早在清朝末期，劉銘傳做臺灣巡撫該下，就鼓勵農民種桑仔樹過畜蠶仔來繅絲。在日本時代，在臺北个公館設立桑苗養成所，下後改名做養蠶所，總督府直接管，開始培育蠶種。
過後日本政府派蠶業專家來臺灣調查，決定在苗栗个大湖設分場（大湖人講个養蠶所、改良場），積極研究家蠶品種个保育改良、蠶種繁殖過栽桑育苗。分場當闊，怕有十過甲地，除忒辦公室、桑仔園，養蠶室，還有冷凍庫這兜先進个設備，連抽水馬桶式便所都係歸大湖盡先有个。另外又在附近仔起乾繭場，專門繅絲。
續下來就設立大湖農蠶專修學校，相當初級農業學校，培養蠶業人才，這就係做麼个臺灣个蠶業推廣人員大體都係大湖人。光復後學校改名到大湖農業學校，民國四十四年成立高級部，尾項慢慢仔變到這下个大湖農工。文學家李喬（李能棋），中醫師張步桃，客家歌曲音樂家涂敏恒做盡係校友。
吾四個阿哥就係在這隻學校畢業，吾大哥在鄉公所做到退休，二哥一直在改良場做，後生該下還調去嘉義、竹東兩十年，指導畜蠶仔種桑仔。
吾姪女大湖農校蠶絲科、文化學院个蠶絲系畢業，在池上輔導蠶桑个推廣幾下年，背尾調轉苗栗公館个蠶蜂業改良場，還去讀中興大學昆蟲系研究所，得著碩士學位，前幾年仔正退休。
吾大嫂係公館人，做妹仔人該下在公館蠶絲場做，結婚過後還做誒會十年。民國五十年邊仔，有兜人起勢蓋蠶絲被，較輕又較燒暖。吾大哥兩公婆就買蠶繭來做被賣。買著个蠶繭愛煠過曬燥，請人鬆過，正做得拉被。
拉蠶絲被愛一儕企一頭，用暗力拉，已食力，一層一層仔鋪，盡多工。佢兩公婆愛下班正有時間拉被，做好一領被愛歸禮拜仔。逐領被就係純手工个，料仔好價數又實在，無幾久仔就打出名聲，當有銷頭，做毋著來賣。吾大嫂有恁多个實務經驗，下後大湖農校蠶絲科還請佢去帶實習課。
講著臺灣个蠶業，定著愛講大功勞者謝源水先生。佢係吾莊項人，厥公係開大湖个四大墾首之一，去日本留學轉來，先經營屋下个事業，民國三十九年接任蠶業改良場場長，有計劃个提高蠶繭个產量，除忒將莊頭脣國有林班地个樟樹園改種桑仔樹之外，還在潮州、埔里、竹東過臺東設推廣區，故所上下二港正會恁多大湖个養蠶人才。謝場長領導有方，無幾多年，臺灣个蠶繭年產量就超過誒日本時代个。
該下个蠶業改良場在臺北个公館，有辦公室過宿舍，下後配合政府个政策徙到苗栗个公館，正改建做民族國中，隔條羅斯福路个桑仔園就起師大分部，大湖分場下後改到天敵繁殖分場。
這下人去大湖看著个就係草莓園、酒莊，看毋著桑仔樹，乜看毋著蠶仔。古人講个：滄海桑田，正經有影。
