新街溪个生態景致（下）──水岸行廊
【文、圖∕徐貴榮∕國立中央大學客家語文暨社會科學學系兼任助理教授】
發音人：徐貴榮（四縣腔）
中山路埔頂橋過忒，河壩兩片都有行廊，一直到普義路「新街橋」。這段右岸跈等溪州路行，左岸經過最兼街市个屋背尾，經過人講「新街廟」个「仁海宮」，故所安佢「新街段」，差毋多愛行10分鐘。
從埔頂橋到中央里伯公下个無名橋，大約五十零公尺，兩岸小葉欖仁樹，兩排看啊過去，樹梗直直，樹葉青青，看起來當靚當有精神。伯公下有一隻小食攤仔，阿蠻鬧熱。過忒伯公下，河壩變到當闊，魚仔當多，長透看得着水鳥仔、白鶴仔在該覓啊覓欸，尋看啊有麽个好食料？到八德橋前，右岸有一隻長寮形个細公園，有休閒傢伙好使用。兩排高大个樟樹連等，熱天風吹涼沁沁仔，實在鬆爽。（圖1）
圖1 新街段八德橋前兩岸行廊个雨中朝晨（2021.07.22攝）
過一截仔到忠義橋，仁海宮就在眼前，廟左片有古色古香个聖蹟亭、東門伯公。仁海宮係中壢个民間信仰中心，自清朝道光年間起到今有兩百大零年吔！經過幾下擺个翻修、打醮，這下變到當整、當有藝術个「中壢媽」大廟，留存當多有名个石雕、文人對聯筆跡，有閒做得行過去參拜、參觀一下。
新街廟面前，本來有一座「北白川紀念碑」，光復過忒無幾久就分人敲忒吔！這下廣場伸着果菜市場，逐日朝晨鬧熱煎煎！過忒忠義橋，河壩開始轉向東，因為河壩整治个關係，頭擺分人泅水，人講「深潭」个「南門潭」，新街過埔頂个「石跳仔」也無咧！河水斯斯，日夜無停，流往大海毋回頭，無法度轉到頭擺个景致哩！
新街橋過去無行廊，愛跈人行道到對面延平路正有行廊，行往下一直到高速公路為止。（圖2）這段有當多里，差毋多係工業區、住宅區，係頭擺个「水尾庄」地界，故所安佢「水尾段」，大約愛行45分鐘。
圖2 新街溪下游行廊个終點：高速公路、桃園大圳（2021.07.16攝）
從這下去，水流漸漸仔轉向北。行廊在右岸，無幾遠仔看得着廊脣掛等一幅一幅个24孝圖，鼓勵人愛行孝。美隆橋前，有「黃屋庄坑」个水合落來，河壩水有變較大兜仔。無幾久福州橋過後，到南園二路个永福橋這截，兩岸有行廊。右岸係工業住宅區，廊脣一排當大頭个樹仔當涼爽，比新街段該截還較涼，看得着當闊着，景致也當靚。左岸還有一大片難得个田園景致，打爽个係大部分荒忒吔！
永福橋到福德橋，又伸着右岸好行，右片有一座公園，這下規劃到中壢藝術園區，當多樹仔又當大頭，（圖3）裡背有運動公園，分民眾好運動，展示當多雕塑作品（圖4），連便所也設計到圓形个茅屋（圖5），伯公祠造型像教堂，發揮藝術創造人个智慧。
圖3 中壢藝術公園个行廊、樹仔（2021.07.16攝）
圖4 中壢藝術公園个藝術裝置（2021.07.16攝）
圖5 中壢藝術藝術公園个便所（2021.07.16攝）
過忒福德橋下去到高速公路，接着桃園大圳就愛斡頭了唷！行廊跈等工業區工廠後背，這段無樹仔，係日頭當烈就愛擎遮仔囉！
中壢本來係臺灣客家庄盡大个都市，毋過因為幾十年來工商業个發展，外來人口超過在地人口，街路店面當難聽着客話咧！朝晨暗晡在這散步、運動、休閒个人群，聽佢兜講个話，水尾段係工業區，外來人盡多，還係有人講客話。新街段最兼新街老市區，講客話个人也異多。毋過，上游石頭、林森、龍岡這段，雖然也係新興社區，試着講客話个人又還較多。
新街溪在中壢市內大約有12.8公里，行廊全長大約就有8公里零。政府做這河壩行廊，分市民休閒運動，無幾遠仔就有休閒凳椅、涼亭，分人好坐尞。緊行緊看，看魚看水，看鳥看景致，身體康健，心情又鬆爽，實在功德無量。新街溪流過个所在較偏僻，大部分在人屋个屎背尾，故所當多地方，行廊係用鋼架探出河壩駁做个（圖6），可見政府个用心，中壢人實在真有福。
※本文的「着」，同教育部訂的「著」之意。
圖6 用鋼架探出河壩駁做个行廊，整治過後个新街溪河壩（2021.06.22攝，地點：健行橋南側）
